19 ءساۋىر كۇنى اقش-تىڭ ءىرى قالالارىندا — ۆاشينگتون، نيۋ-يورك، سان-فرانتسيسكو جانە باسقا دا مەگاپوليستەردە دونالد ترامپقا قارسى جاپپاي نارازىلىق اكتسيالارى ءوتتى، دەپ حابارلايدى "ادىرنا" ۇلتتىق پورتالى Deutsche Welle-گە سىلتەمە جاساپ.
نارازىلىق بىلدىرۋشىلەر اق ءۇي باسشىسىن اۆتوريتارلىق باسقارۋ ءستيلى ءۇشىن جانە زاڭسىز ميگرانتتاردى سوتسىز دەپورتاتسيالاۋ ارەكەتتەرى ءۇشىن سىنعا الدى.
ۆاشينگتوندا جۇزدەگەن ادام اق ءۇيدىڭ الدىنا جينالىپ، قولدارىنا «پاتشا كەرەك ەمەس»، «ترامپقا يمپيچمەنت» دەگەن جازۋى بار پلاكاتتار ۇستاعان. اكتسياعا قاتىسۋشى بەندجامين دۋگلاس بيلىك وكىلدەرىنىڭ كسەنوفوبيانى قوزدىرىپ، قۇقىقتىق كەپىلدىكتەردى بۇزۋ ءۇشىن جەكە تۇلعالاردى پايدالاناتىنىن ايتتى.
نيۋ-يورك قالاسىندا نارازىلىق بىلدىرۋشىلەر قوعامدىق كىتاپحانانىڭ الدىنداعى الاڭعا جينالعان. 73 جاستاعى كەتي ۆالي، وتباسى حولوكوستتان امان قالعانىن ايتىپ، قازىرگى جاعداي مەن گيتلەردىڭ بيلىككە كەلۋ كەزەڭىن سالىستىرۋدا.
سان-فرانتسيسكوداعى وۋشەن-بيچ جاعاجايىندا بىرنەشە ءجۇز ادام جينالىپ، ءوز دەنەلەرىمەن IMPEACH + REMOVE («يمپيچمەنت + قىزمەتتەن كەتسىن») دەگەن جازۋ جاساپ، توڭكەرىلگەن اقش تۋىن كوتەرىپ شىقتى. بۇل — داعدارىس پەن اپاتتىڭ ءداستۇرلى بەلگىسى رەتىندە قابىلدانادى.
نارازىلىق اكتسيالارىن ۇيىمداستىرۋشى — 50501 توبى. بۇل اتاۋ — «50 شتاتتا 50 نارازىلىق جانە ءبىر قوزعالىس» دەگەن ماعىنا بەرەدى. ۇيىم ءوز سايتىندا شامامەن 400 نارازىلىق شاراسى وتكىزىلگەنىن حابارلاپ، ولاردىڭ بەيبىت سيپاتتا ءوتۋىنىڭ ماڭىزدىلىعىن اتاپ ءوتتى.
