مەملەكەتتىك كەڭەسشى ەرلان قارين ءوزىنىڭ الەۋمەتتىك جەلىدەگى پاراقشاسىندا دۋلات يسابەكوۆ تۋرالى جازبا جاريالادى، حابارلايدى “ادىرنا” ۇلتتىق پورتالى.
ەرلان قارين جازباسىندا دۋلات يسابەكوۆتىڭ قازاق رۋحانياتىنداعى ەرەكشە ورنى مەن ونىڭ شىعارمالارىنىڭ وقىرماندار جۇرەگىنە جول تاپقانىن اتاپ ءوتتى.
“تۇنمەن تالاسىپ قابىرعا قايىستىرار سۋىق حابار جەتتى. قازاقتىڭ ءبىرتۋار پەرزەنتى دۋلات يسابەكوۆ اعامىز ومىردەن ءوتىپتى.
دۋلات اعا تۋرالى وتكەن شاقتا جازۋ سونشالىقتى قيىن ەكەنىن ەندى عانا جان جۇرەگىممەن سەزىنىپ وتىرمىن. ونىڭ قازاق رۋحانياتى ءۇشىن ورنى ەرەكشە ەدى. ميلليونداعان وقىرمانىنىڭ ءبىرى ءارى ايرىقشا سىيلاسقان رۋحاني ءىنىسى رەتىندە مەن ءۇشىن ونىڭ ورنى ءتىپتى بولەك ەدى.
دۋلات يسابەكوۆ قازاق ادەبيەتىنە ەرەكشە قۇبىلىس بولىپ كەلدى. شىن مانىندە شوقتىعى بيىك شىعارمالار جازىپ، قالىڭ وقىرماننىڭ جۇرەگىنە جول تاپتى. ونىڭ قالامىنان شىققان ءاربىر تۋىندى جۇرتشىلىق ىزدەپ ءجۇرىپ وقيتىن كلاسسيكالىق دۇنيەگە اينالدى. ءبىز ايگىلى قالامگەردىڭ ءاربىر شىعارماسىن جاستانا وقىپ وستىك. دۋلات يسابەكوۆتىڭ «قارعىن» رومانى – ءتول ادەبيەتىمىزدى دامىتۋعا ەرەكشە ىقپال ەتكەن تۋىندى. سونداي-اق، ونىڭ «گاۋھار تاس» پوۆەسى – قازاق وقىرمانى ەڭ كوپ وقىعان شىعارمانىڭ ءبىرى. ايگىلى پوۆەستىڭ نەگىزىندە تۇسىرىلگەن فيلم قازاق كينوسىنىڭ التىن قورىنا قوسىلعان قۇندى قازىناعا اينالدى. ەلۋ جىلدان استام ۋاقىت بۇرىن جازىلعان وسى شىعارمانىڭ جەلىسىندە استانا قالاسىنىڭ مۋزىكالىق جاس كورەرمەندەر تەاترى قويعان سپەكتاكل ەكى جىلدان بەرى انشلاگپەن ءوتىپ كەلەدى. مۇنىڭ ءوزى جازۋشى شىعارمالارىنىڭ ارادا قانشا جىل وتسە دە ومىرشەڭدىگىن جويمايتىنىن ايقىن كورسەتەدى.
مەن دۋلات اعامەن جاقىن ارالاستىم، سىيلاس ءىنىسى بولدىم. ءبىز ۇنەمى كەزدەسىپ، ءتۇرلى تاقىرىپتا اڭگىمە-دۇكەن قۇراتىنبىز. اعامىز ايىقپاس سىرقاتقا شالدىعىپ، سوڭعى كەزدە ءحالى ءتىپتى اۋىرلاپ كەتتى. ءالسىن-ءالسىن حابارلاسىپ، حال-جاعدايىن سۇراپ قوياتىنمىن. وتكەن اپتادا اياق استىنان اعادان حات الدىم. ءوزىنىڭ جاعدايى تومەندەگەنىن سەزگەن-اۋ، «ەندى كورىسپەسپىز، اعالىعىمدى ارقالانىپ ارتىق كەتكەن كەزدەرىم بولسا كەش» دەگەن سارىندا جازىپتى”، - دەپ جازدى ول.
سونداي-اق، ەرلان قارين دۋلات يسابەكوۆپەن جاقىن ارالاسقانىن، ونىڭ ءومىرىنىڭ سوڭعى ساتتەرىندە بىرگە بولعانىن جانە جازۋشىنىڭ ەل بولاشاعى تۋرالى ويلارىن بولىسكەنىن ايتتى.
“دۇيسەنبى كۇنى تاڭ اتا الماتىعا ۇشتىم. تۋرا اعانىڭ ۇيىنە تارتتىم. دۋلات اعا قينالىپ جاتىر ەكەن، بىراق قازاقتىڭ قارانارى سىر بىلدىرمەۋگە تىرىستى. نەعىپ سۋىت ءجۇرسىڭ دەپ، ادەتتەگىدەي ازىلدەي قارسى الدى. حال ۇستىندە جاتقانىنا قاراماستان ەڭسەسىن تۇسىرگەن جوق. جانىن جەگىدەي جەگەن دەرتىن ەمەس، ەلدىڭ ءسوزىن ايتتى. ءوزى ەرەكشە سۇيگەن قازاعىنىڭ ەرتەڭىنە، مىنا الماعايىپ زامانداعى مەملەكەتىنىڭ بولاشاعىنا قاتىستى ويلارىن جەتكىزدى. ارا-تۇرا ءسال كىدىرىپ، تەرەڭ تىنىستاپ الىپ، تۋعان ەلى تۋرالى ايتقان سوزدەرىن اعانىڭ بىزگە، كەيىنگى ۇرپاققا قالدىرىپ جاتقان اماناتى، وسيەتى دەپ قابىلدادىم. جانىنان جىبەرگىسى كەلمەسە دە، «جۇمىسىڭ كوپ قوي، جولىڭنان قالما» دەپ، مەنىڭ قامىمدى ويلاپ جاتتى. ال، مەن قانشا قيماسام دا اعانىڭ اسىل جانى قينالىپ قالماسىن دەپ، امالسىز كەتتىم. شىنىمدى ايتسام، قوشتاسۋعا بارعانىمدى ءبىلىپ تۇرعانمەن، ونىمەن قوشتاسا المادىم، دۇرىسى، قوشتاسقىم كەلمەدى. ءالى دە جانىمىزدا جۇرە تۇرعانىن قالادىم. ءبىز، ءبىر-ەكى اپتادان كەيىن تاعى دا كەزدەسىپ، اڭگىمەلەسەتىن بولىپ كەلىستىك. بىراق، كەلەسى كەزدەسۋدى جازباپتى...
قازاق رۋحانياتى ءۇشىن جاڭا جىل وڭاي بولعان جوق. قاڭتاردا مۇحتار ماعاۋين، اقپاندا دۋلات يسابەكوۆ... الىپتار اقىرىنداپ كەتىپ جاتىر. اسقار تاۋلاردىڭ قاتارى سيرەپ، تۇتاس داۋىرلەر كوشىپ جاتىر. قولدان كەلەتىن قايران جوق، اللانىڭ امىرىنە امال جوق.
قازاقتان ءسوز ارتىلعان با؟ وشپەيتىن ءومىر، سىنبايتىن تەمىر جوق. دۋلات اعانىڭ وتباسىنا، جاقىندارىنا قايعىرا كوڭىل ايتامىن! اعامىزعا اللا يماننىڭ بايلىعىن بەرسىن! جانى ءجانناتتا، توپىراعى تورقا بولسىن! جاراتۋشى يەمىز قالعان قازاققا ۇزاق عۇمىر، بەرەكەت بەرسىن!” - دەلىنگەن ەرلان قاريننىڭ جازباسىندا.
