Memlekettık keŋesşı Erlan Qarin özınıŋ äleumettık jelıdegı paraqşasynda Dulat İsabekov turaly jazba jariialady, habarlaidy “Adyrna” ūlttyq portaly.
Erlan Qarin jazbasynda Dulat İsabekovtıŋ qazaq ruhaniiatyndaǧy erekşe orny men onyŋ şyǧarmalarynyŋ oqyrmandar jüregıne jol tapqanyn atap öttı.
“Tünmen talasyp qabyrǧa qaiystyrar suyq habar jettı. Qazaqtyŋ bırtuar perzentı Dulat İsabekov aǧamyz ömırden ötıptı.
Dulat aǧa turaly ötken şaqta jazu sonşalyqty qiyn ekenın endı ǧana jan jüregımmen sezınıp otyrmyn. Onyŋ qazaq ruhaniiaty üşın orny erekşe edı. Milliondaǧan oqyrmanynyŋ bırı ärı airyqşa syilasqan ruhani ınısı retınde men üşın onyŋ orny tıptı bölek edı.
Dulat İsabekov qazaq ädebietıne erekşe qūbylys bolyp keldı. Şyn mänınde şoqtyǧy biık şyǧarmalar jazyp, qalyŋ oqyrmannyŋ jüregıne jol tapty. Onyŋ qalamynan şyqqan ärbır tuyndy jūrtşylyq ızdep jürıp oqityn klassikalyq düniege ainaldy. Bız äigılı qalamgerdıŋ ärbır şyǧarmasyn jastana oqyp östık. Dulat İsabekovtyŋ «Qarǧyn» romany – töl ädebietımızdı damytuǧa erekşe yqpal etken tuyndy. Sondai-aq, onyŋ «Gauhar tas» povesı – qazaq oqyrmany eŋ köp oqyǧan şyǧarmanyŋ bırı. Äigılı povestıŋ negızınde tüsırılgen film qazaq kinosynyŋ altyn qoryna qosylǧan qūndy qazynaǧa ainaldy. Elu jyldan astam uaqyt būryn jazylǧan osy şyǧarmanyŋ jelısınde Astana qalasynyŋ Muzykalyq jas körermender teatry qoiǧan spektakl ekı jyldan berı anşlagpen ötıp keledı. Mūnyŋ özı jazuşy şyǧarmalarynyŋ arada qanşa jyl ötse de ömırşeŋdıgın joimaitynyn aiqyn körsetedı.
Men Dulat aǧamen jaqyn aralastym, syilas ınısı boldym. Bız ünemı kezdesıp, türlı taqyrypta äŋgıme-düken qūratynbyz. Aǧamyz aiyqpas syrqatqa şaldyǧyp, soŋǧy kezde hälı tıptı auyrlap kettı. Älsın-älsın habarlasyp, hal-jaǧdaiyn sūrap qoiatynmyn. Ötken aptada aiaq astynan aǧadan hat aldym. Özınıŋ jaǧdaiy tömendegenın sezgen-au, «Endı körıspespız, aǧalyǧymdy arqalanyp artyq ketken kezderım bolsa keş» degen sarynda jazypty”, - dep jazdy ol.
Sondai-aq, Erlan Qarin Dulat İsabekovpen jaqyn aralasqanyn, onyŋ ömırınıŋ soŋǧy sätterınde bırge bolǧanyn jäne jazuşynyŋ el bolaşaǧy turaly oilaryn bölıskenın aitty.
“Düisenbı künı taŋ ata Almatyǧa ūştym. Tura aǧanyŋ üiıne tarttym. Dulat aǧa qinalyp jatyr eken, bıraq qazaqtyŋ qaranary syr bıldırmeuge tyrysty. Neǧyp suyt jürsıŋ dep, ädettegıdei äzıldei qarsy aldy. Hal üstınde jatqanyna qaramastan eŋsesın tüsırgen joq. Janyn jegıdei jegen dertın emes, eldıŋ sözın aitty. Özı erekşe süigen qazaǧynyŋ erteŋıne, myna almaǧaiyp zamandaǧy memleketınıŋ bolaşaǧyna qatysty oilaryn jetkızdı. Ara-tūra säl kıdırıp, tereŋ tynystap alyp, tuǧan elı turaly aitqan sözderın aǧanyŋ bızge, keiıngı ūrpaqqa qaldyryp jatqan amanaty, ösietı dep qabyldadym. Janynan jıbergısı kelmese de, «Jūmysyŋ köp qoi, jolyŋnan qalma» dep, menıŋ qamymdy oilap jatty. Al, men qanşa qimasam da aǧanyŋ asyl jany qinalyp qalmasyn dep, amalsyz kettım. Şynymdy aitsam, qoştasuǧa barǧanymdy bılıp tūrǧanmen, onymen qoştasa almadym, dūrysy, qoştasqym kelmedı. Älı de janymyzda jüre tūrǧanyn qaladym. Bız, bır-ekı aptadan keiın taǧy da kezdesıp, äŋgımelesetın bolyp kelıstık. Bıraq, kelesı kezdesudı jazbapty...
Qazaq ruhaniiaty üşın jaŋa jyl oŋai bolǧan joq. Qaŋtarda Mūhtar Maǧauin, aqpanda Dulat İsabekov... alyptar aqyryndap ketıp jatyr. Asqar taulardyŋ qatary sirep, tūtas däuırler köşıp jatyr. Qoldan keletın qairan joq, Allanyŋ ämırıne amal joq.
Qazaqtan söz artylǧan ba? Öşpeitın ömır, synbaityn temır joq. Dulat aǧanyŋ otbasyna, jaqyndaryna qaiǧyra köŋıl aitamyn! Aǧamyzǧa Alla imannyŋ bailyǧyn bersın! Jany jännatta, topyraǧy torqa bolsyn! Jaratuşy iemız qalǧan qazaqqa ūzaq ǧūmyr, bereket bersın!” - delıngen Erlan Qarinnıŋ jazbasynda.
Ūqsas jaŋalyqtar
