قازاقستاننىڭ ۆيتسە-پرەزيدەنتى، اباي اتىنداعى ادەبيەت پەن ونەر سالاسىنداعى مەملەكەتتىك سىيلىقتى بەرۋ جونىندەگى كوميسسيا توراعاسى ەرلان قارين بيىل سىيلىقتىڭ ەشكىمگە بەرىلمەۋ سەبەبىن ءتۇسىندىردى. بۇل تۋرالى ول الەۋمەتتىك جەلىدەگى پاراقشاسىندا جازدى, دەپ حابارلايدى “ادىرنا”.
ەرلان قاريننىڭ ايتۋىنشا، كونكۋرسقا ۇسىنىلعان ۇمىتكەرلەردىڭ بارلىعى – ۇلتتىق رۋحانياتتىڭ دامۋىنا ۇلەس قوسىپ جۇرگەن بەلگىلى تۇلعالار. الايدا مەملەكەتتىك سىيلىق ناقتى ادامنىڭ بەدەلىنە ەمەس، ونىڭ شىعارماسىنا بەرىلۋى كەرەك.
"كونكۋرسقا تۇسكەن ۇمىتكەرلەردىڭ بارلىعىن سىيلايمىز، قۇرمەتتەيمىز. ولار ءتول رۋحانياتتىڭ دامۋىنا ۇلكەن ۇلەس قوسىپ كەلە جاتقان بەلگىلى تۇلعالار. ءوزىم دە بىرقاتارىن جەكە تانيمىن. بىراق مەملەكەتتىك سىيلىق – تۇلعاعا ەمەس، تۋىندىعا بەرىلەتىن سىيلىق. وسىنىڭ اراجىگىن اجىراتىپ العان دۇرىس. اتاقتى بىرەۋگە ۇناۋ نەمەسە جاعۋ ءۇشىن، رەنجىپ قالماسىن دەگەن سەبەپپەن بەرەتىن بولساق، ونەر ودان دامىمايدى، بۇل اتاقتىڭ مارتەبەسى ارتپايدى", – دەپ جازدى ەرلان قارين.
ونىڭ سوزىنشە، بۇل ماسەلەدە ءتارتىپ ۇستەم بولۋى ءتيىس. ۇسىنىلعان تۋىندىلاردىڭ بارلىعى داۋىسقا سالىنعانىمەن، داۋىس بەرۋ قورىتىندىسى بويىنشا بىردە-ءبىر جۇمىس كوميسسيا مۇشەلەرىنىڭ ايقىن باسىم داۋىسىنا يە بولماعان. كەرىسىنشە، جۇمىستاردى قولداماعاندار مەن قالىس قالعانداردىڭ ۇلەسى باسىم بولدى.
"مىسالى، 2023 جىلى گۋمانيتارلىق عىلىمدار سالاسىنداعى ا.بايتۇرسىنۇلى اتىنداعى مەملەكەتتىك سىيلىق لايىقتى جۇمىستاردىڭ جوقتىعىنا بايلانىستى بەرىلگەن جوق. سوندىقتان كونكۋرس بولعاسىن ونىڭ ناتيجەسى دە ءارتۇرلى بولۋى مۇمكىن، ونى دۇرىس قابىلداۋ كەرەك. وتىرىستىڭ سوڭىندا اباي اتىنداعى مەملەكەتتىك سىيلىققا تۇتاستاي رەفورما كەرەك ەكەنى ايتىلدى. بۇل پىكىردى كەشەلى بەرى جەلى قولدانۋشىلارى دا قولداپ جازۋدا. شىنىندا دا، مەملەكەتتىك سىيلىقتى بەرۋ ءتارتىبى قازىرگى كەزەڭنىڭ تالاپتارىنا سايكەس كەلمەيدى. سىيلىقتىڭ تالاپ، ءتارتىبى عانا ەمەس، مازمۇنى مەن سيپاتى دا وزگەرۋى كەرەك. مىسالى، الەمدەگى ەڭ بەدەلدى نوبەل سىيلىعى 50 نە 70 جاسقا تولعانى ءۇشىن ەمەس، جاڭالىق پەن جاڭاشىلدىق ءۇشىن بەرىلەدى. سول سياقتى اباي اتىنداعى مەملەكەتتىك سىيلىقتى مەرەيتوي يەسىنە، ۇمىتكەردىڭ ماتەريالدىق جاعدايىنا جانە باسقاداي سەبەپتەرگە بايلانىستى ۇسىنۋ جالپى دۇرىس ەمەس. سوندىقتان، مەملەكەتتىك سىيلىق ءتارتىبى مەن ەرەجەسىنە ۇلكەن وزگەرىس ەنگىزەمىز", – دەدى ەرلان قارين.
ايتا كەتەيىك، 2000 جىلداردان بەرى اباي اتىنداعى مەملەكەتتىك سىيلىق 60-قا جۋىق ادامعا بەرىلگەن.
