Memlekettik keńesshi Erlan Qarın óziniń áleýmettik jelidegi paraqshasynda Dýlat Isabekov týraly jazba jarııalady, habarlaıdy “Adyrna” ulttyq portaly.
Erlan Qarın jazbasynda Dýlat Isabekovtiń qazaq rýhanııatyndaǵy erekshe orny men onyń shyǵarmalarynyń oqyrmandar júregine jol tapqanyn atap ótti.
“Túnmen talasyp qabyrǵa qaıystyrar sýyq habar jetti. Qazaqtyń birtýar perzenti Dýlat Isabekov aǵamyz ómirden ótipti.
Dýlat aǵa týraly ótken shaqta jazý sonshalyqty qıyn ekenin endi ǵana jan júregimmen sezinip otyrmyn. Onyń qazaq rýhanııaty úshin orny erekshe edi. Mıllıondaǵan oqyrmanynyń biri ári aıryqsha syılasqan rýhanı inisi retinde men úshin onyń orny tipti bólek edi.
Dýlat Isabekov qazaq ádebıetine erekshe qubylys bolyp keldi. Shyn máninde shoqtyǵy bıik shyǵarmalar jazyp, qalyń oqyrmannyń júregine jol tapty. Onyń qalamynan shyqqan árbir týyndy jurtshylyq izdep júrip oqıtyn klassıkalyq dúnıege aınaldy. Biz áıgili qalamgerdiń árbir shyǵarmasyn jastana oqyp óstik. Dýlat Isabekovtyń «Qarǵyn» romany – tól ádebıetimizdi damytýǵa erekshe yqpal etken týyndy. Sondaı-aq, onyń «Gaýhar tas» povesi – qazaq oqyrmany eń kóp oqyǵan shyǵarmanyń biri. Áıgili povestiń negizinde túsirilgen fılm qazaq kınosynyń altyn qoryna qosylǵan qundy qazynaǵa aınaldy. Elý jyldan astam ýaqyt buryn jazylǵan osy shyǵarmanyń jelisinde Astana qalasynyń Mýzykalyq jas kórermender teatry qoıǵan spektakl eki jyldan beri anshlagpen ótip keledi. Munyń ózi jazýshy shyǵarmalarynyń arada qansha jyl ótse de ómirsheńdigin joımaıtynyn aıqyn kórsetedi.
Men Dýlat aǵamen jaqyn aralastym, syılas inisi boldym. Biz únemi kezdesip, túrli taqyrypta áńgime-dúken quratynbyz. Aǵamyz aıyqpas syrqatqa shaldyǵyp, sońǵy kezde háli tipti aýyrlap ketti. Álsin-álsin habarlasyp, hal-jaǵdaıyn surap qoıatynmyn. Ótken aptada aıaq astynan aǵadan hat aldym. Óziniń jaǵdaıy tómendegenin sezgen-aý, «Endi kórispespiz, aǵalyǵymdy arqalanyp artyq ketken kezderim bolsa kesh» degen sarynda jazypty”, - dep jazdy ol.
Sondaı-aq, Erlan Qarın Dýlat Isabekovpen jaqyn aralasqanyn, onyń ómiriniń sońǵy sátterinde birge bolǵanyn jáne jazýshynyń el bolashaǵy týraly oılaryn bóliskenin aıtty.
“Dúısenbi kúni tań ata Almatyǵa ushtym. Týra aǵanyń úıine tarttym. Dýlat aǵa qınalyp jatyr eken, biraq qazaqtyń qaranary syr bildirmeýge tyrysty. Neǵyp sýyt júrsiń dep, ádettegideı ázildeı qarsy aldy. Hal ústinde jatqanyna qaramastan eńsesin túsirgen joq. Janyn jegideı jegen dertin emes, eldiń sózin aıtty. Ózi erekshe súıgen qazaǵynyń erteńine, myna almaǵaıyp zamandaǵy memleketiniń bolashaǵyna qatysty oılaryn jetkizdi. Ara-tura sál kidirip, tereń tynystap alyp, týǵan eli týraly aıtqan sózderin aǵanyń bizge, keıingi urpaqqa qaldyryp jatqan amanaty, ósıeti dep qabyldadym. Janynan jibergisi kelmese de, «Jumysyń kóp qoı, jolyńnan qalma» dep, meniń qamymdy oılap jatty. Al, men qansha qımasam da aǵanyń asyl jany qınalyp qalmasyn dep, amalsyz kettim. Shynymdy aıtsam, qoshtasýǵa barǵanymdy bilip turǵanmen, onymen qoshtasa almadym, durysy, qoshtasqym kelmedi. Áli de janymyzda júre turǵanyn qaladym. Biz, bir-eki aptadan keıin taǵy da kezdesip, áńgimelesetin bolyp kelistik. Biraq, kelesi kezdesýdi jazbapty...
Qazaq rýhanııaty úshin jańa jyl ońaı bolǵan joq. Qańtarda Muhtar Maǵaýın, aqpanda Dýlat Isabekov... alyptar aqyryndap ketip jatyr. Asqar taýlardyń qatary sırep, tutas dáýirler kóship jatyr. Qoldan keletin qaıran joq, Allanyń ámirine amal joq.
Qazaqtan sóz artylǵan ba? Óshpeıtin ómir, synbaıtyn temir joq. Dýlat aǵanyń otbasyna, jaqyndaryna qaıǵyra kóńil aıtamyn! Aǵamyzǵa Alla ımannyń baılyǵyn bersin! Jany jánnatta, topyraǵy torqa bolsyn! Jaratýshy ıemiz qalǵan qazaqqa uzaq ǵumyr, bereket bersin!” - delingen Erlan Qarınniń jazbasynda.
