ۇلىتاۋ وبلىسىنداعى «قازاقمىس» كەنىشى وپىرىلىپ، جەتى جۇمىسشىنىڭ دا ءمايىتى تابىلدى. ولاردىڭ دەنەلەرى جەر بەتىنە شىعارىلىپ، سوت-مەديتسينالىق ساراپتاما جۇرگىزۋ ءۇشىن پوليتسيا قىزمەتكەرلەرىنە تاپسىردى. بۇل تۋرالى توتەنشە جاعدايلار مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
«بارلىق جەتى جۇمىسشىنىڭ دەنەلەرى جەر بەتىنە شىعارىلىپ، سوت-مەديتسينالىق ساراپتاما جۇرگىزۋ ءۇشىن پوليتسيا قىزمەتكەرلەرىنە تاپسىردى»، - دەپ حابارلادى سەيسەنبى كۇنى.
ولاردىڭ جەكە تۇلعالارى انىقتالۋدا.
قازىرگى ۋاقىتتا وقيعانىڭ بارلىق ءمان-جايلارىن انىقتاۋ ماقساتىندا تەرگەۋ جۇرگىزىلۋدە.
توتەنشە جاعدايلار مينيسترلىگىنىڭ جەدەل شتابى اشقان «قۇلاققاعىس جەلىسى» ارقىلى قازىرگە دەيىن 23 قوڭىراۋ تۇسكەن.
سونىمەن قاتار، مەملەكەت باسشىسى قاسىم-جومارت توقاەۆ «قازاقمىس» كورپوراتسياسىنىڭ ۇلىتاۋ وبلىسىنداعى كەنىشىندە تاۋ ماسساسىنىڭ قۇلاۋى سالدارىنان قازا بولعان جۇمىسشىلاردىڭ تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى.
پرەزيدەنت ۇكىمەتكە توتەنشە جاعدايدىڭ ءمان-جايىن مۇقيات تەكسەرۋ جونىندە مىندەت جۇكتەدى.
سالالىق ۆەدومستۆولار مەن ءوڭىر اكىمدىگىنە مارقۇمداردىڭ وتباسىلارىنا بارلىق قاجەتتى كومەك كورسەتۋ تۋرالى تاپسىرما بەردى.
بۇعان دەيىن ۇلىتاۋ وبلىسىندا شاحتادا 7 جۇمىسشى ءۇيىندى استىندا قالىپ قويعانى تۋرالى حابارلادىق. وقىس وقيعا 17 اقپاندا جاڭاارقا اۋدانىندا ورنالاسقان «جومارت» كەنىشىندە بولعان.
ەسكە سالساق، 2023 جىلى 28 قازان تۇنگى ساعات 02:33-تە قاراعاندى وبلىسىنداعى «ارسەلورميتتال تەمىرتاۋعا» قاراستى كوستەنكو اتىنداعى شاحتادا ءور بولىپ، 46 كەنشى كوز جۇمىپ، 28 كەنشى جاراقاتتانعان بولاتىن.
وقيعا كەزىندە شاحتادا 252 ادام بولعان، 206 كەنشى سىرتقا شىعىپ ۇلگەرگەن ەدى.
بۇگىندە بۇل وقيعاعا قاتىستى 106 تومدىق قىلمىستىق ءىس سوتقا جىبەرىلدى.
تەرگەۋ بارىسىندا جازاتايىم وقيعاعا تاۋ-كەن جۇمىستارى كەزىندە قاۋىپسىزدىك ەرەجەلەرىنىڭ جاپپاي بۇزىلۋى سەبەپ بولعانى انىقتالدى.
شاحتا باسشىلىعى مەن ينجەنەرلىك-تەحنيكالىق قىزمەتكەرلەر قاتارىنان 10 ادام قىلمىستىق جاۋاپكەرشىلىككە تارتىلدى. بارلىعى قاماۋدا. ولارعا قازاقستان رەسپۋبليكاسى قىلمىستىق كودەكسىنىڭ 277-بابىنىڭ 3-بولىگى بويىنشا ("تاۋ-كەن جۇمىستارى كەزىندە قاۋىپسىزدىك ەرەجەلەرىن بۇزۋ") ايىپ تاعىلدى، اتالعان باپ بويىنشا 8 جىلعا دەيىن باس بوستاندىعىنان ايىرۋ جازاسى قاراستىرىلعان.
