الماتى تاۋلارىندا جوعالعان قىزدىڭ ءمايىتى تابىلدى، دەپ حابارلايدى "ادىرنا" ۇلتتىق پورتالى.
مارقۇم 19 جەلتوقسان كۇنى شامامەن ساعات 16:00-دە اپكەسىمەن سوڭعى رەت بايلانىسقا شىعىپ، بۋكرەەۆ شىڭىنان Pioneer تاۋ-شاڭعى كۋرورتىنا قاراي تومەن ءتۇسىپ كەلە جاتقانىن ايتقان. ول تاۋعا ارنالعان اياق كيىم، قارا ءتۇستى قىسقى كومبينەزون، ارنايى باس كيىم كيگەن، قولىندا سنوۋبورد بولعان.
تۋىستارىنىڭ ايتۋىنشا، تامەريس بۇل باعىتپەن بۇرىن بىرنەشە رەت جۇرگەن. Pioneer كۋرورتى ماڭىنداعى بەينەباقىلاۋ كامەرالارى ونىڭ تاڭعى ساعات 6:30-دا جولعا شىققانىن تىركەگەن، الايدا كەرى قايتىپ كەلگەن ءساتى جازبالاردان انىقتالماعان.
20 جەلتوقسان كۇنى Pioneer تاۋ-شاڭعى كۋرورتى Instagram الەۋمەتتىك جەلىسىندەگى پاراقشاسىندا قايعىلى وقيعا تۋرالى حابارلادى.
«بۇگىن قۇتقارۋ قىزمەتى بۋكرەەۆ شىڭى ماڭىندا ءبىر كۇن بۇرىن جوعالىپ كەتكەن قىزدىڭ ءمايىتىن تاپتى. تۇپكىلىكتى سايكەستەندىرۋ ساراپتامالار اياقتالعان سوڭ جۇرگىزىلەدى»، – دەلىنگەن حابارلامادا.
كۋرورت وكىلدەرى وقيعانىڭ دەمالىس ورنى اۋماعىنان تىس، تراسسادان تىس جانە كۋرورتتىڭ جاۋاپكەرشىلىگىنە كىرمەيتىن ايماقتا بولعانىن ناقتىلادى.
سونداي-اق مارقۇمنىڭ تاۋعا جالعىز شىققانى، قۇتقارۋ قىزمەتتەرىنە تىركەلمەگەنى ايتىلدى. كۋرورت اكىمشىلىگى قازا بولعان ادامنىڭ وتباسى مەن جاقىندارىنا كوڭىل ايتىپ، دەمالۋشىلاردى قاۋىپسىزدىك ەرەجەلەرىن ساقتاۋعا، بەلگىلەنگەن اۋماقتاردان شىقپاۋعا جانە تاۋعا جالعىز بارماۋعا شاقىردى.
