ۇلىتاۋ وبلىسىنىڭ اكىمدىگى مەن «قازاقمىس كورپوراتسياسى» جشس ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويدى.
ماڭىزدى قۇجات اياسىندا 20 ملرد تەڭگەدەن استام سوماعا الەۋمەتتىك باستامالاردى جۇزەگە اسىرۋ جوسپارلانۋدا.
قۇجاتقا ۇلىتاۋ وبلىسىنىڭ اكىمى داستان رىسپەكوۆ پەن «قازاقمىس كورپوراتسياسى» جشس باسقارما توراعاسى رۋسلان وسكەنالى قول قويدى. سەرىكتەستىكتىڭ جاڭا كەزەڭى دەنساۋلىق ساقتاۋ، ءبىلىم بەرۋ، مادەنيەت جانە سپورت سالالارىنداعى جوبالاردى، ءوڭىر ينفراقۇرىلىمىن جاڭعىرتۋدى، اباتتاندىرۋ جۇمىستارىن جانە تۇرعىندار ءۇشىن قولايلى ورتا قالىپتاستىرۋدى قامتيدى.
مەموراندۋم اياسىندا ۇلىتاۋ ۋنيۆەرسيتەتىن اشۋ كوزدەلگەن. سونداي-اق بيىل وڭىردەگى ەڭ ءىرى جاڭا ورتالىق مەشىتتى (جەزقازعان قالاسى), ساتباەۆ قالاسىنداعى جاڭا تراۆماتولوگيالىق پۋنكتتى اياقتاپ، پايدالانۋعا بەرۋ جوسپارلانعان. بۇدان بولەك، وڭىردە تەڭدەسى جوق «نامىس» بالالار-جاسوسپىرىمدەر سپورت اكادەمياسى» سپورت كەشەنى 150 ورىندىق سپورت ينتەرناتىمەن بىرگە ىسكە قوسىلادى.
وعان قوسا، جەزقازعاندا «جاستار» ساياباعىن، «عارىشكەرلەر» باقجولىن جانە كەڭگىر سۋ قويماسىنىڭ جاعالاۋىن اباتتاندىرۋ جۇمىستارى جۇرگىزىلەدى. س.قوجامقۇلوۆ اتىنداعى تەاتر عيماراتىن دا كۇردەلى جوندەۋ جوسپارلانعان.
باستامالار قاتارىندا «Ulytau» فۋتبول كلۋبىن قارجىلاندىرۋدى جالعاستىرۋ دا قاراستىرىلعان.
سونىمەن قاتار جەرگىلىكتى اتقارۋشى ورگاندارعا ينفراقۇرىلىمدىق جوبالاردى جۇزەگە اسىرۋدا قولداۋ كورسەتۋ ماقساتىندا وبلىستىڭ سۋمەن جابدىقتاۋ، سۋ بۇرۋ جانە ەنەرگيامەن قامتۋ جۇيەلەرىن جاڭعىرتۋعا ارنالعان بىرقاتار جوبالىق-سمەتالىق قۇجاتتاما ازىرلەنەدى.
