Ұлытау облысында шахтада 7 жұмысшы үйінді астында қалып қойды. Бұл туралы «Қазақмыс» компаниялар тобы айтты, деп хабарлайды «Адырна» тілшісі.
Оқыс оқиға бүгін, 17 ақпанда Жаңаарқа ауданында орналасқан «Жомарт» кенішінде болған.
«Қазақмыс корпорациясының» «Жомарт» кенішінде тау жынысы опырылып түсті. Оқиға салдарынан 7 жұмысшы үйіндінің арғы жағында қалды. Кабельдердің үзілуіне байланысты қазіргі уақытта жұмысшылармен байланыс жоқ»,—делінген хабарламада.
Қазір оқиға орнында іздестіру-құтқару жұмыстары жүргізіліп жатыр. Оған ТЖД-ның 21 қызметкері мен 7 техникасы жұмылдырылған. Сондай-ақ құтқару жұмыстарына «Серіктес» АҚҚ-ның 2 бөлімшесі қосылды.
