قاڭتاردىڭ 30-ىنا رەسەيدىڭ سۆەردلوۆ وبلىسىنىڭ بەرەزوۆسكي دەگەن قالاسىندا اكىم سايلاۋ وتكەن عوي. سول قاتتى شۋ بوپ جاتىر قازىر. قىسقاشا بىلاي.
قالانىڭ پيستسوۆ دەيتىن اكىمى قايتادان سايلاۋعا ءتۇسىپ، تاعى بەس جىل اكىم بولعىسى كەلىپتى. اكىم بولماعاننان، اكىم بولعان جاقسى عوي.
سونان پيستسوۆ وڭاي جولىن ىزدەيدى. ەڭ اۋەلى، اكىم بولعىسى كەلەتىن تاۋەلسىز كانديداتتاردىڭ تىرسەگىن قيىپ تاستايدى.
سوسىن ءوزىنىڭ شوپىرىنىڭ يۋليا دەگەن كەلىنشەگىن شاقىرىپ الىپ، وسىلاي دا وسىلاي، سايلاۋدا ماعان باسەكەلەس كانديدات بولاسىڭ دەپ كوزىن قىسىپ قويادى.
اكىم ايتسا جان قالا ما، يۋليا دەرەۋ تىركەلىپ، ۇگىت-ناسيحات جاساعانسيدى. ءوزى دە سول اكىمدىكتە ءبولىم مەڭگەرۋشىسى ەكەن.
اكىمدى قالانىڭ ءماسليحاتى سايلايدى. ءماسليحات - اكىمنىڭ اشسا الاقانىندا، جۇمسا جۇدىرىعىندا، ەش ۋايىم جوق.
ءسويتىپ جۇرگەندە سايلاۋ جەتىپ، داۋىستى ساناپ كەپ جىبەرگەندە قۋىرشاق كانديدات - يۋليا اكىمنەن كوپ داۋىس الىپ كەتىپ، قاس ماسقارا بولادى عوي.
ونى ەستىپ اكىم تالىپ قالادى. اكىمنىڭ تالىپ قالعانىن ەستىپ، يۋليا تالىپ قالادى. يۋليانىڭ تالىپ قالعانىن ەستىپ، اكىمنىڭ شوپىرى بوپ جۇرگەن كۇيەۋى تالىپ قالادى.
ايتەۋ ەسىن جيا سالا يۋليا تاپىراقتاپ سوتقا جۇگىرەدى.
- مەنى زاڭسىز سايلادى، اكىم بولايىن دەگەن ويىم جوق ەدى،- دەيدى قيىلىپ.
سوتقا دا كەرەگى سول، بۇكىل قاعازدى اۋدارىپ توڭكەرەدى، بىراق ەش كىلتيپان تاپپايدى. ءبارى دۇرىس!
يۋليا قازىر وعان دا كونبەي، اكىم بولمايمىن دەپ ات-تونىن الا قاشىپ جاتىر دەيدى. ۇياتى بار ايەل ەكەن دەگەنمەن. الدە بۇرىنعى اكىم قوش بول دەپ ايتىپ، تاعى دا بىردەڭە دەدى مە، ول جاعىن بىلمەدىم.
يۋليا وسىنداي سۇمدىق بولارىن سەزىپ، سايلاۋعا بىرەر كۇن قالعاندا كانديداتۋرامدى الىپ تاستايمىن دەپ جۇگىرىپتى.
سويتسە، زاڭ بويىنشا سايلاۋعا بىرەر كۇن قالعاندا كانديداتۋراڭدى الا المايدى ەكەنسىڭ.
ماسەلەن، الگى اكىم يۋليادان باسقا دا ءۇش قۋىرشاق كانديدات تىركەتىپ، سايلاۋعا ءبىر كۇن قالعاندا قۇدايدان توتەنشە پارمەن ءتۇسىپ و دۇنيەلىك بوپ كەتسە، قالاسا دا، قالاماسا دا قۋىرشاق كانديداتتىڭ ءبىرى سايلانادى. "مەن اشەيىن جيگۋلي ەدىم" دەگەن اڭگىمە جۇرمەيدى ەكەن.
وسىنداي قىزىق بوپ جاتىر، جولداستار.
كوپ ويناساڭ، قۋىرشاق تا زيان.
اسىلحان ماماشۇلى
