Qańtardyń 30-yna Reseıdiń Sverdlov oblysynyń Berezovskıı degen qalasynda ákim saılaý ótken ǵoı. Sol qatty shý bop jatyr qazir. Qysqasha bylaı.
Qalanyń Pısov deıtin ákimi qaıtadan saılaýǵa túsip, taǵy bes jyl ákim bolǵysy kelipti. Ákim bolmaǵannan, ákim bolǵan jaqsy ǵoı.
Sonan Pısov ońaı jolyn izdeıdi. Eń áýeli, ákim bolǵysy keletin táýelsiz kandıdattardyń tirsegin qıyp tastaıdy.
Sosyn óziniń shopyrynyń Iýlııa degen kelinshegin shaqyryp alyp, osylaı da osylaı, saılaýda maǵan básekeles kandıdat bolasyń dep kózin qysyp qoıady.
Ákim aıtsa jan qala ma, Iýlııa dereý tirkelip, úgit-nasıhat jasaǵansıdy. Ózi de sol ákimdikte bólim meńgerýshisi eken.
Ákimdi qalanyń máslıhaty saılaıdy. Máslıhat - ákimniń ashsa alaqanynda, jumsa judyryǵynda, esh ýaıym joq.
Sóıtip júrgende saılaý jetip, daýysty sanap kep jibergende qýyrshaq kandıdat - Iýlııa ákimnen kóp daýys alyp ketip, qas masqara bolady ǵoı.
Ony estip ákim talyp qalady. Ákimniń talyp qalǵanyn estip, Iýlııa talyp qalady. Iýlııanyń talyp qalǵanyn estip, ákimniń shopyry bop júrgen kúıeýi talyp qalady.
Áıteý esin jııa sala Iýlııa tapyraqtap sotqa júgiredi.
- Meni zańsyz saılady, ákim bolaıyn degen oıym joq edi,- deıdi qıylyp.
Sotqa da keregi sol, búkil qaǵazdy aýdaryp tóńkeredi, biraq esh kiltıpan tappaıdy. Bári durys!
Iýlııa qazir oǵan da kónbeı, ákim bolmaımyn dep at-tonyn ala qashyp jatyr deıdi. Uıaty bar áıel eken degenmen. Álde burynǵy ákim qosh bol dep aıtyp, taǵy da birdeńe dedi me, ol jaǵyn bilmedim.
Iýlııa osyndaı sumdyq bolaryn sezip, saılaýǵa birer kún qalǵanda kandıdatýramdy alyp tastaımyn dep júgiripti.
Sóıtse, zań boıynsha saılaýǵa birer kún qalǵanda kandıdatýrańdy ala almaıdy ekensiń.
Máselen, álgi ákim Iýlııadan basqa da úsh qýyrshaq kandıdat tirketip, saılaýǵa bir kún qalǵanda Qudaıdan tótenshe pármen túsip o dúnıelik bop ketse, qalasa da, qalamasa da qýyrshaq kandıdattyń biri saılanady. "Men ásheıin jıgýlı edim" degen áńgime júrmeıdi eken.
Osyndaı qyzyq bop jatyr, joldastar.
Kóp oınasań, qýyrshaq ta zııan.
Asylhan Mamashuly
