ۋكراينا: اگرەسسوردىڭ مۇرنىن بۇزىپ، ناتو-عا كىرەمىز!

3745

ۋكراينانىڭ ءبىرىنشى پرەزيدەنتى لەونيد كراۆچۋك "رەسەي ءوزىن ۋكراينانىڭ شىعىسىنداعى سوعىسقا قاتىسى بارىن مويىنداماسا، وندا قاتاڭ شارالارعا بارۋ كەرەكتىگىن" مالىمدەدى. كراۆچۋك ماسكەۋ ءوزىن بۇل قاقتىعىستا تەك باقىلاۋشى ءرولىن سومداپ، سوعىسقا تىكەلەي قاتىسى جوق تاراپتاي ۇستانىپ كەلەدى دەيدى. 

"جاعداي سول ءبىر ورىندا تۇر، رەسەي تاراپىنان ماسەلەنى شەشۋگە قاتىستى ۇسىنىستار جوق. ول تۇسىنىكسىز پوزيتسيانى ۇستانۋدا. ولار باقىلاۋشى ءرولىن اتقارىپ ءجۇرمىز دەيدى. قىزىق. ولارعا ەشكىم باقىلاۋشى بولۋعا قۇقىق بەرگەن ەمەس. سوندىقتان ەگەر رەسەي وسىلايشا بۇل قاقتىعىسقا قاتىسى جوقتاي كەيىپ تانىتىپ، باقىلاۋشى ءرولىن سومداپ، كەلىسسوزدەردىڭ ىسكە اسۋىنا كەدەرگى جاساۋدى جالعاستىرسا، وندا تىعىرىقتان شىعۋ مۇمكىن ەمەس. تىعىرىقتان شىعۋدىڭ جولى تەك قاتاڭ راديكالدىق شارالارعا كوشۋ عانا.

ماسكەۋ بىزگە قىزىل سىزىقتان ءوتىپ كەتتىڭدەر دەيدى. ونى ءبىرىنشى وتكەن كىم؟ وزدەرى ءوتىپ، وزدەرى بايبالام سالۋدا. جاقىندا عانا مەن اۆاكوۆتىڭ بايانداماسىن ەستىدىم. رەسەي تاراپىنان جاسالاتىن ءتۇرلى ستسەناريلەرگە قاتىستى ناقتى قابىلدايتىن جاۋاپتارىمىز بارىن ايتتى. قازىرگى ۋكراينا 5, 6, 7 جىل بۇرىنعى ۋكراينا ەمەس. بۇگىن ءبىز ءبىزدىڭ شاقىرتۋىمىزسىز ەلىمىزگە كەلەتىن اگرەسسوردىڭ مۇرنىن بەت قىلۋعا دايىنبىز. ءبىز ونى قالامايمىز، بىراق ءبىز دايىنبىز.

ۋكراينا ناتو-عا كىرۋى ءتيىس. باسقا امال جوق. ناتو مۇشەسى بولۋ ارقىلى عانا ءبىز تاۋەلسىز ۋكراينانىڭ بولاشاعىن قالاي الامىز", - دەدى ۋكراينانىڭ ءبىرىنشى پرەزيدەنتى كراۆچۋك. 

اسحات قاسەنعالي،
«ادىرنا» ۇلتتىق پورتالى

 

پىكىرلەر
ۇقساس جاڭالىقتار