سونىمەن ۋكراينا-رەسەي سوعىسىنا قاتىستى ترامپتىڭ ناقتى پوزيتسياسى بەلگىلى بولا باستادى. جانە بۇل پوزيتسيا كوڭىل كونشىتەرلىك ەمەس.
ترامپ پۋتينمەن سويلەسكەنىن ايتتى. بۇل تۋرالى ول Truth Social جەلىسىنە جازدى. بىلاي دەيدى:
"مەن جاڭا عانا رەسەي پرەزيدەنتى ۆلاديمير پۋتينمەن ۇزاق ۋاقىت تەلەفونمەن سويلەستىم. ءبىز ۋكراينانى، تاياۋ شىعىستى، ەنەرگەتيكانى، جاساندى ينتەللەكتىنى، دوللاردىڭ ىقپالىن جانە باسقانى ءسوز ەتتىك. ءبىز ەكەۋمىز دە ءوز حالقىمىزدىڭ ۇلى تاريحىن ەسكە الدىق جانە ەكىنشى دۇنيەجۇزىلىك سوعىستا بىرگە سوعىسىپ، جەڭىسكە جەتكەنىمىزدى ايتتىق. رەسەي ول ساتتە ونداعان ميلليون حالقىن جوعالتتى، بىزدە از شىعىنعا ۇشىرامادىق. ءبىز ءوز ەلىمىزدىڭ قۋاتى مەن بولاشاقتاعى ءوزارا ارىپتەستىك ارقىلى تابۋعا بولاتىن پايدانى ايتتىق. الايدا ەڭ الدىمەن ءبىز رەسەي مەن ۋكراينا اراسىنداعى سوعىستى جانە جاپپاي قىرعىندى توقتاتۋ جايلى كەلىستىك. پرەزيدەنت پۋتين ءتىپتى مەنىڭ سايلاۋ ناۋقانىنداعى «سەرگەك وي» ۇرانىمدى دا قولداندى. ەكەۋمىز دە وسىعان سەنەمىز. بىز تىعىز بايلانىس ۇستاۋعا كەلىستىك جانە ەكى ەل اراسىنداعى ساپاردى دا ويلاستىرۋدامىز. سونىمەن بىرگە ءبىز ءوز كوماندالارىمىزعا دەرەۋ ارادا كەلىسسوزدى باستاۋعا تاپسىرما بەرۋگە كەلىستىك. مەنىڭ ءبىرىنشى قادامىم ۋكراينا پرەزيدەنتى زەلەنسكيگە قوڭىراۋ شالۋدان باستالادى، مەن وعان قازىر حابارلاسىپ، پۋتينمەن سويلەسكەنىمدى ايتامىن. مەن مەملەكەتتىك حاتشى ماركو رۋبيوعا، تسرۋ ديرەكتورى دجون رەتكليففكە، ۇلتتىق قاۋىپسىزدىك بويىنشا كەڭەسشى مايكل ۋولتتسقا جانە ارنايى وكىل ستيۆ ۋيتكوففقا كەلىسسوزدى باستاۋعا تاپسىردىم جانە ونىڭ ناتيجەلىلىگىنە سەنەمىن. مەن پرەزيدەنت بولسام بۇل سوعىس بولماس ەدى جانە ميلليوندار ولمەس ەدى. الايدا سوعىس بولدى، دەمەك ونى اياقتاۋ قاجەت. ەندى ادامداردىڭ عۇمىرى ۇزىلمەۋى تيىس!مەن پرەزيدەنت پۋتينگە وسى اڭگىمە بارىسى ءۇشىن العىس ايتقىم كەلەدى جانە كەشە كەرەمەت جان مارك فوگەلدى بوساتقانىنا ريزاشىلىق بىلدىرەمىن. مەن ونى اق ۇيدە ءوزىم كۇتىپ الدىم. مەن بۇل پروتسەسستىڭ جاقىن ارادا قاقتىعىستى ءتيىمدى رەتتەيتىنىنە سەنەمىن!" - دەپ جازدى.
ترامپتىڭ اڭگىمەسىنەن نە ۇعۋعا بولادى؟
بىرىنشىدەن، ترامپ زەلەنسكيمەن سويلەسىپ، قاقتىعىس نۇكتەلەرى بويىنشا ورتاق كوزقاراس قالىپتاستىرىپ، ارتىنشا پۋتينگە حابارلاسۋى ءتيىس ەدى. لوگيكا بويىنشا سولاي. الايدا ول پۋتينمەن ءبىرىنشى سويلەستى جانە تۇيىسەتىن نۇكتەلەردى انىقتادى.
ەكىنشىدەن، ترامپتىڭ پوستىندا ارنايى وكىل ۋيتكوفف جايلى ايتىلدى. ۋيتكوفف نەگىزىنەن تاياۋ شىعىس بويىنشا ارنايى وكىل ەدى، ال ۋكراينا بويىنشا ارنايى وكىل كيت كەللوگگ بولاتىن. كەللوگگ جايلى ءبىر اۋىز ءسوز جوق. سوعىستى اياقتاۋعا قاتىستى نۇسقالاردى كەللوگگ ۇسىنادى، بىراق ول تۋرالى ەشتەڭە ايتىلمادى. كەللوگگتىڭ پىكىرى دە، جۇمىسى دا، وسى ۋاقىتقا دەيىن وتكىزگەن كەزدەسۋلەرى دە قانشالىقتى ماڭىزعا يە ەكەنى تۇسىنىكسىز بولىپ قالدى. الداعى ميۋنحەن قاۋىپسىزدىك كونفەرەنتسياسىندا ول ەۋروپا ەلدەرىمەن كەزدەسەدى. نە ايتارىن كورەمىز.
ۇشىنشىدەن، بۇگىن "رامشتاين" كەزدەسۋى ءوتتى. اقش-تىڭ قورعانىس ءمينيسترى پيت حەگسەت قاتىستى. العاش رەت رامشتاين كەزدەسۋىندە اقش ۋكرايناعا اسكەري كومەك پاكەتىن جاريالامادى. حەگسەت اقش ءۇشىن نەگىزگى باسەكەلەستىك ايماق قىتاي ءوڭىرى ەكەنىن ايتتى. قازىر اقش-تان ۋكرايناعا كەلىپ جاتقان قارۋ بايدەن بەرىپ كەتكەن قارۋلار. ال ترامپ قارۋ بەرۋدى جالعاستىرا ما، جوق پا، ول جاعى بەيمالىم.
