5 اقپان كۇنى اتىراۋ وبلىسى قۇلسارى قالاسىنداعى مەكتەپتەردىڭ بىرىندە 10 سىنىپ وقۋشىسى قاتارلاستارىمەن بولعان جانجالدان كەيىن ولاردى بالتامەن قۋالاعان. سالدارىنان ەكى وقۋشى جەڭىل دەنە جاراقاتىن الدى. بۇل تۋرالى اتىراۋ وبلىستىق پوليتسيا دەپارتامەنتى مالىمدەدى، دەپ حابارلايدى "ادىرنا".
"حابارلاما تۇسكەن بويدا وقيعا ورنىنا پوليتسيا قىزمەتكەرلەرى جەدەل جەتىپ، ءجاسوسپىرىم انىقتالىپ، ۇستالدى. وقيعاعا قاتىسۋشىلار مەن ولاردىڭ اتا-انالارى پوليتسيا بولىمىنە جەتكىزىلدى. اتالعان دەرەك بويىنشا بۇزاقىلىق فاكتىسىمەن قىلمىستىق ءىس قوزعالدى. 15 جاستاعى كۇدىكتى ۋاقىتشا ۇستاۋ يزولياتورىنا قامالىپ، ىشكى ىستەر ورگاندارىنىڭ ەسەبىنە الىندى", - دەپ مالىمدەدى پد ءباسپاسوز قىزمەتى.
جيناقتالعان ماتەريالدار شەشىم قابىلداۋ ءۇشىن كامەلەتكە تولماعانداردىڭ ىستەرى جونىندەگى كوميسسياعا جولدانعان. سونداي-اق ءجاسوسپىرىمنىڭ اتا-اناسىنا قاتىستى كامەلەتكە تولماعان بالانى تاربيەلەۋ جونىندەگى مىندەتتەرىن تيىسىنشە ورىنداماعانى ءۇشىن اكىمشىلىك ءىس قوزعالدى.
"قىلمىستىق ءىس اياسىندا قىلمىسقا ىقپال ەتكەن سەبەپتەر مەن جاعدايلاردى جويۋ تۋرالى ءبىلىم بەرۋ بولىمىنە ۇسىنىس ەنگىزىلدى. تەرگەۋ قورىتىندىسى بويىنشا ءبىلىم بەرۋ ۇيىمىنىڭ لاۋازىمدى تۇلعالارىنىڭ، سونداي-اق وقۋ ورنىن كۇزەتۋدى جۇزەگە اسىرعان كۇزەت اگەنتتىگى قىزمەتكەرلەرىنىڭ ارەكەتتەرىنە قۇقىقتىق باعا بەرىلەتىن بولادى", - دەلىنگەن پد رەسمي مالىمدەمەسىندە.
