اتىراۋ وبلىسىنىڭ جىلىوي اۋدانىندا سەگىزىنشى سىنىپ وقۋشىسى اسىلىپ قالدى. ونىڭ دەنەسىن اتا-اناسى ءوز ءۇيىنىڭ شاتىرىنان تاپقان، دەپ حابارلايدى “ادىرنا” ۇلتتىق پورتالى «استانا» تەلەارناسىنا سىلتەمە جاساپ.
14 جاستاعى ءجاسوسپىرىم وزىنە قول سالعان كەزدە ۇيدە ەشكىم بولماعان. وقيعا دەمالىس كۇنى ورىن العان. ودان ءبىر كۇن بۇرىن ءجاسوسپىرىم دەنساۋلىعىنا بايلانىستى ساباققا بارماپتى. ونى اتا-اناسى سىنىپ جەتەكشىسىنە ەسكەرتكەن. ال اپتا باسىندا وسى مەكتەپتە دەسترۋكتيۆتى ءدىني اعىمدار، سۋيتسيد، زورلىق-زومبىلىق تاقىرىبى بويىنشا جوعارى سىنىپ وقۋشىلارىنا اقپاراتتىق ءتۇسىندىرۋ جۇمىستارى وتكىزىلىپتى. مەكتەپتەگى شارالارعا بەلسەنە ارالاساتىن وقۋشىنىڭ مۇنداي قادامعا نەگە بارعانىن ۇستازدار دا تۇسىنە الماي وتىر.
«وقۋشى وتە اشىق مىنەزدى، باسقالارمەن دە، سىنىپتاستارىمەن دە، مۇعالىممەن دە، سىنىپ جەتەكشىسمەن دە جاقسى قارىم-قاتىناستا بولدى. ەشقانداي دا وعاش مىنەز-قۇلقىن كورسەتكەن ەمەس. دالىزدە دە ءوزىن ءتارتىپتى ۇستايتىن بولدى. ساباقتان سەبەپسىز قالمايتىن»، - دەيدى №18 م. ساتىبالديەۆ اتىنداعى ورتا مەكتەپ ديرەكتورىنىڭ تاربيە ءىسى جونىندەگى ورىنباسارى رىسگۇل قادىروۆا.
ءجاسوسپىرىمنىڭ سۋيتسيدكە نە ءۇشىن بارعانىن پوليتسيا انىقتاپ جاتىر.
ايتا كەتەيىك، وبلىستا جىل باسىنان بەرى 16 ءجاسوسپىرىم ءوز-وزىنە قول جۇمساعان، ونىڭ ۇشەۋى قايتىس بولدى.
«جىلىوي اۋدانىندا بولعان سۋيتسيد دەرەگىنە بايلانىستى قازىرگى تاڭدا قك 105-بابىنا سايكەس تەرگەۋ امالدارى جۇرگىزىلۋدە. جانە دە قايتىس بولعان 2008 جىلعى ءجاسوسپىرىمنىڭ بۇرىن مىنەز-قۇلقىندا ەشقانداي تارتىپسىزدىك دەرەكتەرى تىركەلمەگەندىگى انىقتالعان»، - دەدى اتىراۋ وبلىستىق پد ءباسپاسوز حاتشىسى مەيىرىم ەرداۋلەت.
