تاجىكستانداعى بيلىكتى باسىپ الۋ ارەكەتى جانە مەملەكەتكە وپاسىزدىق جاساۋ ءىسى بويىنشا ايىپتالۋشىلار سوڭعى سوزىندە ءوز كىنالارىن مويىنداعان جوق. بۇل تۋرالى «ازيا-پليۋس» اگەنتتىگى ءوزىنىڭ دەرەككوزدەرىنە سىلتەمە جاساپ جاريالادى، دەپ حابارلايدى “ادىرنا” ۇلتتىق پورتالى
22 قاڭتاردا دۋشانبەدەگى تەرگەۋ يزولياتورىندا «توڭكەرىس جاساۋ» ءىسى بويىنشا كەزەكتى سوت وتىرىسى ءوتتى. اتاپ ايتقاندا، تاجىكستاننىڭ بۇرىنعى سىرتقى ىستەر ءمينيسترى حامروحون زاريفي زەينەتكەرلىككە شىققاننان كەيىن ءوزىن تولىعىمەن عىلىمعا ارناپ، ساياساتتان الشاقتاپ كەتكەنىن ايتتى. ول عىلىمي ماقالالار مەن كىتاپتاردى ۇسىنىپ، تاعىلعان ايىپتى جوققا شىعارىپ، بوساتۋدى سۇرادى.
تاجىكستاننىڭ سوتسيال-دەموكراتيالىق پارتياسى ءبىرىنشى ۆيتسە-پرەزيدەنتى زاڭگەر شوكيردجون حاكيموۆ وزىنە قارسى بارلىق ايىپتاۋلاردى تەرىسكە شىعارا وتىرىپ، ءوز ءومىرىن مەملەكەت پەن ۇلت ماسەلەلەرىن شەشۋگە ارناعان ناعىز پاتريوت ەكەنىن اتاپ ءوتتى. ءسوز سويلەگەندەر سوتتان ولاردى بوساتۋدى سۇرادى.
ەسكە سالا كەتسەك، سوتتالۋشىلار قاتارىندا زاريفي مەن حاكيموۆتان باسقا، تاجىكستان پارلامەنتىنىڭ دەپۋتاتى، تاجىكستاننىڭ دەموكراتيالىق پارتياسىنىڭ بۇرىنعى جەتەكشىسى سايددجافار ۋسمونزودا، ونىڭ ءبىرىنشى ورىنباسارى احمادشوح كوميلزودا، سىرتقى ىستەر مينيسترلىگىنىڭ ءبىر دەپارتامەنتىنىڭ بۇرىنعى باسشىسى ابدۋلفايز اتوي، تاجىكستان جوعارعى كەڭەسىنىڭ بۇرىنعى توراعاسى اكبارشوح يسكانداروۆ، سونداي-اق مەملەكەتتىك ۇلتتىق قاۋىپسىزدىك كوميتەتىنىڭ بۇرىنعى قىزمەتكەرلەرى نۇرامين گانيزودا مەن دجامشەد بوبوەۆ بار.
ولاردىڭ كوپشىلىگى تاجىكستاننىڭ قىلمىستىق كودەكسىنىڭ 305-بابى («مەملەكەتتىك وپاسىزدىق») جانە 306-بابى («بيلىكتى باسىپ الۋ») بويىنشا ايىپتالۋدا. كەيبىر سوتتالۋشىلارعا 247-باپ («الاياقتىق») جانە 189-باپ («ۇلتارالىق، ناسىلدىك، ايماقتىق نەمەسە ءدىني ارازدىقتى قوزدىرۋ») بويىنشا ايىپتار تاعىلعان.
سوت پروتسەسى جابىق تۇردە ءوتىپ جاتىر، ول تۋرالى اقپارات قۇپيالاندىرىلعان. العاشقى وتىرىس 14 قاراشادا ءوتتى. ال 8 قاڭتارداعى وتىرىستا پروكۋرور سوتتالۋشىلارعا 20 جىلدان 30 جىلعا دەيىن باس بوستاندىعىنان ايىرۋ جازاسىن سۇرادى.
