الماتىدا 28 جاستاعى رامازان يسحاروۆ ەسىمدى ەر ادام بىرنەشە قىزدى “ۇيلەنەمىن” دەپ الداپ، ولاردىڭ اتىنان ءىرى كولەمدە نەسيە راسىمدەتكەنى ءۇشىن سوتقا تارتىلدى، دەپ حابارلايدى “ادىرنا” ۇلتتىق پورتالى Stan.kz سايتىنا سىلتەپ.
تەرگەۋ مالىمەتىنشە، يسحاروۆ 2022 جىلدان باستاپ ءوزىن پوليتسيا قىزمەتكەرى رەتىندە تانىستىرىپ، قىزداردىڭ سەنىمىنە كىرگەن. ول ولارعا ۇيلەنۋگە ۋادە بەرىپ، ءتۇرلى سىلتاۋلارمەن اتتارىنا نەسيە راسىمدەتىپ، كەيىن اقشامەن بىرگە جوعالىپ وتىرعان. جالپى شىعىن كولەمى شامامەن 80 ميلليون تەڭگەنى قۇراعان.
زارداپ شەككەندەر اراسىندا ءۇش قىز جانە يسحاروۆتىڭ بۇرىنعى دوسى بار. كەيبىر جابىرلەنۋشىلەر ۇيىنەن ايىرىلىپ قالا جازداسا، بىرەۋى كۇدىكتىنىڭ قولىنان سوققى كورگەن.
جابىرلەنۋشىلەردىڭ ءبىرى يسحاروۆپەن فوتوسالوندا تانىسقانىن ايتتى. العاشقى كەزدەسۋدەن-اق ەر ادام قىزدىڭ تۇرمىس جاعدايىن، باسپاناسى مەن نەسيەسى بار-جوعىن سۇراعان. ءبىر اپتادان سوڭ ول قىزدى 700 مىڭ تەڭگە نەسيە الۋعا كوندىرىپ، كەيىن تاعى بىرنەشە بانك پەن ميكروقارجى ۇيىمىنان قارىز راسىمدەتكەن.
قىزدىڭ اتىنداعى جالپى قارىز كولەمى شامامەن 12 ميلليون تەڭگەگە جەتكەن. يسحاروۆ اقشانى “بيزنەسكە سالامىن” دەپ سەندىرىپ، قىزدىڭ اتىنا تاكسوپارك اشىپ، جەكە كاسىپكەر رەتىندە تىركەتكەن.
بۇدان بولەك، 2023 جىلدىڭ قاراشاسىندا ول قىزدى پاتەرىن كەپىلگە قويۋعا دا ماجبۇرلەگەن. نوتاريۋس پەن ءۇشىنشى تۇلعالاردىڭ قاتىسۋىمەن 6,5 ميلليون تەڭگە قولما-قول الىنعان، كەيىن يسحاروۆ ءىزىن سۋىتقان. قىز پاتەرىن تەك كۇدىكتىنىڭ اناسى اقشانىڭ ءبىر بولىگىن قايتارعان سوڭ ساقتاپ قالعان.
جابىرلەنۋشىنىڭ ايتۋىنشا، يسحاروۆ وزىنە ارىز جازدىرماۋ ءۇشىن قورقىتىپ، “پوليتسيادا ىستەيمىن، ەشكىم ماعان ەشتەڭە ىستەي المايدى” دەپ قىسىم كورسەتكەن. قىز بىرنەشە رەت ارىزدانۋعا تىرىسقانىمەن، تەك 2024 جىلدىڭ ناۋرىز ايىندا عانا رەسمي تۇردە ءوتىنىش قابىلدانعان.
“قارىز بەن قىسىمنان كەيىن دەپرەسسياعا ءتۇسىپ، ءوز-وزىمە قول جۇمساماق بولدىم”، – دەيدى ول.
قازىرگى ۋاقىتتا رامازان يسحاروۆقا قىلمىستىق كودەكستىڭ 190-بابىنىڭ 3-بولىگى، 1-تارماعى ء(ىرى كولەمدە الاياقتىق) جانە 109-1-بابىنىڭ 1-بولىگى (ۇرىپ-سوعۋ) بويىنشا ايىپ تاعىلعان.
سوتتا ايىپتالۋشى كىناسىن مويىنداپ، شىعىندى وتەۋگە دايىن ەكەنىن ايتتى. ول تەك كومەكتەسكىسى كەلگەنىن، العان اقشانىڭ ءبىر بولىگىن قايتارعانىن جانە ءوز كارتاسى بۇعاتتالعاندىقتان قىزدىڭ كارتاسىن پايدالانعانىن مالىمدەدى.
الايدا سوت تەرگەۋى بارىسىندا يسحاروۆتىڭ ەشقاشان پوليتسيادا رەسمي تۇردە قىزمەت ەتپەگەنى انىقتالدى. ول تەك 2017 جىلى اۋەزوۆ اۋداندىق پوليتسيا بولىمىندە جارتى جىلدىق تاجىريبەدەن وتكەن.
سوت پروتسەسى جالعاسۋدا.
