2025 جىلدىڭ ءساۋىر ايىنىڭ سوڭىندا الماتى قالاسىنىڭ بوستاندىق اۋداندىق سوتى لۋنين اندرەي ءبوريسوۆيچتىڭ «فريدوم فينانس» اكتسيونەرلىك قوعامىنا قارسى اۆتورلىق قۇقىقتى بۇزۋ ءىسى بويىنشا تالابىن قاناعاتتاندىردى. سوت شەشىمىمەن جاۋاپكەرگە تيەسىلى الەۋمەتتىك جەلى پاراقشالارىنان تالاپكەرگە تيەسىلى فوتوسۋرەتتەردى الىپ تاستاۋ جانە اۆتورلىق قۇقىقتى بۇزعانى ءۇشىن وتەماقى تولەۋ مىندەتتەلدى، دەپ حابارلايدى “ادىرنا” ۇلتتىق پورتالى قازتاگ-قا سىلتەپ.
اندرەي لۋنين – تانىمال قازاقستاندىق فوتوگراف، «Press House» جشس-ءنىڭ (Forbes Kazakhstan جۋرنالى) شتاتتىق قىزمەتكەرى.
2017 جىلدىڭ قىركۇيەگىنەن باستاپ 2023 جىلدىڭ ناۋرىزىنا دەيىن تالاپكەر جۇمىس بەرۋشىنىڭ (Press House جشس) تاپسىرىسى بويىنشا فوتوسۋرەتتەر تۇسىرگەن. اتاپ ايتقاندا، ول تاۋلاردىڭ توبەسىندە «BANK RBK» جازۋى بار عيماراتتىڭ جوعارعى بولىگىن جانە تيمۋر رۋسلانۇلى تۋرلوۆتىڭ فوتوسۋرەتتەرىن جاساعان. بۇل فوتوسۋرەتتەر كەيىن forbes.kz سايتىنداعى ماقالالاردى بەزەندىرۋ ءۇشىن پايدالانىلعان.
2023 جىلدىڭ شىلدە ايىندا اندرەي لۋنين اۆتورلىق قۇقىقتارى وزىنە تيەسىلى بۇل فوتوسۋرەتتەردىڭ Instagram جەلىسىندەگى ffin.kz جانە ffin.life اككاۋنتتارىندا زاڭسىز قولدانىلعانىن انىقتاعان. https://ffin.kz/ سايتىنداعى اقپاراتقا سايكەس، بۇل دومەن «فريدوم فينانس» اق-عا تيەسىلى. بۇل دەرەك www.ps.kz سايتىنداعى اقپاراتپەن دە راستالادى («ينتەرنەت-كومپانيا PS» — قازاقستاندىق حوستينگ جانە دومەن تىركەۋشى).
جاۋاپكەر ffin.kz جانە ffin.life Instagram پاراقشالارىندا تالاپكەردىڭ رۇقساتىنسىز، اۆتور رەتىندە ەسىمىن كورسەتپەي فوتوسۋرەتتەردى جاريالاعان. بۇل كەلەسى اۆتورلىق قۇقىقتاردى بۇزكعا جاتادى:
- اۆتوردىڭ مورالدىق قۇقىعى — ەسىمدى كورسەتۋ قۇقىعى;
- مۇلىكتىك ەرەكشە قۇقىق — تۋىندىنى وڭدەۋ، قايتا جاساۋ قۇقىعى;
- مۇلىكتىك ەرەكشە قۇقىق — تۋىندىنى جۇرتشىلىققا جەتكىزۋ قۇقىعى (قازاقستان رەسپۋبليكاسى جوعارعى سوتىنىڭ 2007 جىلعى 25 جەلتوقسانداعى №11 نورماتيۆتىك قاۋلىسىنىڭ 13-1-تارماعى).
وسىعان بايلانىستى جانە قازاقستان رەسپۋبليكاسىنىڭ «اۆتورلىق قۇقىق جانە ساباقتاس قۇقىقتار تۋرالى» زاڭىنىڭ 49-بابىنىڭ 3-تارماعىنا، قر ازاماتتىق ءىس جۇرگىزۋ كودەكسىنىڭ 148–149-باپتارىنا سۇيەنە وتىرىپ، تالاپكەر لۋنين ا.ب. كەلەسى تالاپتاردى قويدى:
- «فريدوم فينانس» اق تاراپىنان ffin.kz جانە ffin.life اككاۋنتتارىندا 2020 جىلعى 16 ماۋسىمدا، 2021 جىلعى 1 قازاندا، 2022 جىلعى 12 قاڭتاردا جانە 2023 جىلعى 16 ناۋرىزدا زاڭسىز جاريالانعان فوتوسۋرەتتەر بويىنشا اۆتورلىق قۇقىقتارىنىڭ بۇزىلعانىن مويىنداۋ;
- قۇقىقتى بۇزىپ وتىرعان ارەكەتتەردى توقتاتۋ جانە بۇل فوتوسۋرەتتەردى اتالعان Instagram پاراقشالارىنان الىپ تاستاۋ;
- «فريدوم فينانس» اق-نان وتەماقى ءوندىرۋ.
بوستاندىق اۋداندىق سوتى «فريدوم فينانس» اكتسيونەرلىك قوعامىنا ffin.kz جانە ffin.life Instagram پاراقشالارىنان 2020 جىلعى 16 ماۋسىمدا، 2021 جىلعى 1 قازاندا، 2022 جىلعى 12 قاڭتاردا جانە 2023 جىلعى 16 ناۋرىزدا جاريالانعان فوتوسۋرەتتەردى جويۋدى، سونداي-اق اۆتورلىق قۇقىقتى بۇزعانى ءۇشىن لۋنين اندرەي ءبوريسوۆيچتىڭ پايداسىنا وتەماقى تولەۋدى مىندەتتەدى.
