2025 جىلعى 18 قاڭتاردا قازاقستان مەن رەسەي اراسىنداعى مەملەكەتتىك شەكارا تۋرالى شارتقا قول قويىلعانىنا 20 جىل تولدى. بۇل قۇجات شەكارانى دەليميتاتسيالاۋدىڭ اياقتالۋىن جانە ەكى ەل اراسىنداعى تۇراقتى، تاتۋ كورشىلىك قارىم-قاتىناستاردىڭ ورناۋىن ءبىلدىردى، دەپ حابارلايدى "ادىرنا" ۇلتتىق پورتالى Baq.kz-كە سىلتەپ.
قازاقستان مەن رەسەي اراسىنداعى شەكارا 2005 جىلى كارتادا ناقتى انىقتالىپ، دەليميتاتسيادان ءوتتى. كەلىسىم 2006 جىلدىڭ قاڭتارىندا كۇشىنە ەندى. بۇل پوستكەڭەستىك كەڭىستىكتەگى ەڭ ۇزىن قۇرلىق شەكاراسى – 7548 شاقىرىمدى بەيبىت ءارى ءتيىمدى رەتتەۋدىڭ ۇلگىسىنە اينالدى.
مەملەكەت باسشىسى قاسىم-جومارت توقاەۆ بۇل كەلىسىمدى حالىقارالىق دەڭگەيدە تانىلعان، ەكىجاقتى تۇراقتىلىقتىڭ نەگىزى دەپ اتادى. ونىڭ ايتۋىنشا، شەكارا تۋرالى شارت بىرىككەن ۇلتتار ۇيىمىنىڭ حاتشىلىعىندا تىركەلگەن جانە اۋماقتىق داۋلارعا جول بەرمەيدى.
شەكارانىڭ ناقتى انىقتالۋى – كەز كەلگەن تاۋەلسىز مەملەكەت ءۇشىن اسا ماڭىزدى. بۇل كەلىسىم قازاقستان مەن رەسەي اراسىنداعى ەكونوميكالىق جانە ساياسي قاتىناستاردىڭ نىعايۋىنا نەگىز قالادى. سونىمەن قاتار، شەكارا ايماعىنداعى زاڭسىز كوشى-قون مەن كونترابانداعا قارسى كۇرەستە ماڭىزدى ءرول اتقاردى.
بۇگىندە ەكى ەل اراسىنداعى شەكارانى دەماركاتسيالاۋ جۇيەلى تۇردە جالعاسىپ كەلەدى. بۇل پروتسەسس شەكارانى ناقتىلاۋمەن قاتار، قاۋىپسىزدىك پەن ەكونوميكالىق ىنتىماقتاستىقتى دامىتۋعا ىقپال ەتەدى.
قازاقستان مەن رەسەي ەنەرگەتيكا، كولىك، لوگيستيكا جانە اۋىل شارۋاشىلىعى سالالارىندا بىرقاتار بىرلەسكەن جوبالاردى جۇزەگە اسىرىپ كەلەدى. مىسالى، ءۇش جاڭا جەو قۇرىلىسى، ەكىباستۇز گرەس-ءىن جاڭعىرتۋ جانە ەلدىڭ وڭتۇستىك جانە شىعىس ايماقتارىن گازداندىرۋ سياقتى ءىرى جوبالار ىسكە اسىرىلۋدا.
رەسەي قازاقستاننىڭ ەڭ ءىرى ساۋدا سەرىكتەستەرىنىڭ ءبىرى بولىپ تابىلادى. 2024 جىلدىڭ قاڭتار-قىركۇيەك ايلارىندا ەكى ەل اراسىنداعى تاۋار اينالىمى 20 ميلليارد دوللاردان استى.
ساياساتتانۋشى ايگەرىم وسپانوۆا قازاقستان مەن رەسەي اراسىنداعى شەكارا كەلىسىمى پوستكەڭەستىك كەڭىستىكتەگى تۇراقتىلىق پەن بەيبىت شەشىمنىڭ ۇلگىسى ەكەنىن اتاپ ءوتتى. ونىڭ ايتۋىنشا، ەكونوميكالىق، مادەني جانە ساياسي باعىتتاردا ىنتىماقتاستىقتى ودان ءارى دامىتۋ ەكى ەلدىڭ مۇددەسىنە سايكەس كەلەدى.
