قىتاي ازاماتتىق اۆياتسيا باسقارماسى (ۋگا) سوڭعى ۋاقىتتا ازەربايجان مەن وڭتۇستىك كورەيا اۋە كومپانيالارىندا ورىن العان اۋە اپاتتارىنان كەيىن قاۋىپسىزدىك شارالارىن كۇشەيتۋدى قولعا الدى، دەپ حابارلايدى "ادىرنا" ۇلتتىق پورتالى.
بۇل تۋرالى باسقارمانىڭ قاۋىپسىزدىك ديرەكتورى شۋ مينتسزيان مالىمدەگەن.
"سوڭعى ءىرى اۋە اپاتتارىنا بايلانىستى ءبىز جەدەل وتىرىستار وتكىزىپ، قاۋىپ-قاتەردىڭ الدىن الۋ شارالارىن كۇشەيتتىك. وسى ماقساتتا ءبىز قاۋىپسىزدىككە قاتىستى توتەنشە جاعدايلارعا جىلدام ارەكەت ەتۋدى تالاپ ەتەتىن باعىتتارعا باسىمدىق بەرۋدەمىز", – دەدى شۋ مينتسزيان ءباسپاسوز ءماسليحاتىندا.
باسقارما ەلدىڭ بارلىق اۋەجايلارىندا تەكسەرۋ جۇمىستارىن ۇيىمداستىرىپ، ۇشۋ-قونۋ جولاقتارىنداعى قاۋىپتەردى جان-جاقتى انىقتاۋ ءۇشىن شارالار قابىلدادى. شۋ مينتسزياننىڭ ايتۋىنشا، اۋەجايلاردا قۇستاردى ۇركىتۋ جانە ولاردىڭ اۋەجاي اۋماعىنا كىرۋىنە جول بەرمەۋ باعىتىندا بەلسەندى جۇمىستار جۇرگىزىلۋدە.
"توتەنشە جاعدايلاردى جويۋ بويىنشا وقۋ-جاتتىعۋ شارالارىن كۇشەيتىپ، شۇعىل ارەكەت ەتۋ تيىمدىلىگىن ارتتىرامىز", – دەپ قوستى ول. سونىمەن قاتار، ۋگا جۇيەلى شارالاردى ىسكە اسىرۋعا نازار اۋدارىپ، اۆياتسيا قىزمەتكەرلەرىنىڭ دايىندىق دەڭگەيىن ارتتىرۋدى قامتاماسىز ەتەتىنىن ايتتى.
