ۇلىبريتانيا بيلىگى اسكەري-تەڭىز كۇشتەرىنىڭ ۇشقىشسىز ءسۋۇستى اپپاراتتارىنا ورناتىلعان كامەرالار قىتايداعى IP-مەكەنجايعا تەحنيكالىق اقپارات جىبەرگەنىن انىقتادى. بۇل تۋرالى The Telegraph باسىلىمى جازدى، دەپ حابارلايدى "ادىرنا".
ماسەلە بريتاندىق قورعانىس مەردىگەرى Kraken Technology Group كومپانياسى جەتكىزگەن K3 Scout ۇشقىشسىز اپپاراتتارىنا قاتىستى بولىپ وتىر. اپپاراتتارعا ورناتىلعان كامەرالار ءۇشىنشى تاراپ كومپانياسىنان ساتىپ الىنعان. اتالعان كومپانيا بۇعان دەيىن جابدىقتاردىڭ قاۋىپسىزدىگىنە كەپىلدىك بەرگەن.
تەكسەرۋ بارىسىندا كامەرالاردىڭ قۇرامىنان قىتايدا وندىرىلگەن كومپونەنتتەر انىقتالعان. كەيىنگى زەرتتەۋ قۇرىلعىلاردىڭ قىتايداعى IP-مەكەنجايعا جۇيەنىڭ جۇمىس جاعدايى تۋرالى تەحنيكالىق دەرەكتەردى جىبەرگەنىن كورسەتتى.
اتاپ ايتقاندا، كامەرالار جابدىقتىڭ جەلىگە قوسىلعانى جانە ونىڭ جۇمىس ىستەپ تۇرعانى تۋرالى «جۇيە كۇيىنىڭ سيگنالدارىن» جولداعان.
وقيعا انىقتالعاننان كەيىن ۇلىبريتانيانىڭ قورعانىس مينيسترلىگى اتالعان ۇشقىشسىز اپپاراتتاردى ينتەرنەتتەن اجىراتقان.
دەگەنمەن بريتاندىق ۆەدومستۆو وكىلىنىڭ ايتۋىنشا، جۇرگىزىلگەن تەرگەۋ بارىسىندا سەزىمتال نەمەسە اسا ماڭىزدى اقپاراتتىڭ شەتەلگە تارالعانىن كورسەتەتىن ەشقانداي بەلگى انىقتالماعان.
بريتان تاراپى قازىرگى تاڭدا وقيعانىڭ قاۋىپسىزدىككە ىقتيمال اسەرىن باعالاپ، جابدىقتاردىڭ جۇمىس ىستەۋ ءتارتىبىن قايتا قاراستىرىپ جاتىر.
