Qytaı azamattyq avıaııa basqarmasy (ÝGA) sońǵy ýaqytta Ázerbaıjan men Ońtústik Koreıa áýe kompanııalarynda oryn alǵan áýe apattarynan keıin qaýipsizdik sharalaryn kúsheıtýdi qolǵa aldy, dep habarlaıdy "Adyrna" ulttyq portaly.
Bul týraly basqarmanyń qaýipsizdik dırektory Shý Mınzıan málimdegen.
"Sońǵy iri áýe apattaryna baılanysty biz jedel otyrystar ótkizip, qaýip-qaterdiń aldyn alý sharalaryn kúsheıttik. Osy maqsatta biz qaýipsizdikke qatysty tótenshe jaǵdaılarǵa jyldam áreket etýdi talap etetin baǵyttarǵa basymdyq berýdemiz", – dedi Shý Mınzıan baspasóz máslıhatynda.
Basqarma eldiń barlyq áýejaılarynda tekserý jumystaryn uıymdastyryp, ushý-qoný jolaqtaryndaǵy qaýipterdi jan-jaqty anyqtaý úshin sharalar qabyldady. Shý Mınzıannyń aıtýynsha, áýejaılarda qustardy úrkitý jáne olardyń áýejaı aýmaǵyna kirýine jol bermeý baǵytynda belsendi jumystar júrgizilýde.
"Tótenshe jaǵdaılardy joıý boıynsha oqý-jattyǵý sharalaryn kúsheıtip, shuǵyl áreket etý tıimdiligin arttyramyz", – dep qosty ol. Sonymen qatar, ÝGA júıeli sharalardy iske asyrýǵa nazar aýdaryp, avıaııa qyzmetkerleriniń daıyndyq deńgeıin arttyrýdy qamtamasyz etetinin aıtty.
