قىتاي كومپانياسى شىمكەنتتە قوقىس ورتەيتىن زاۋىت سالادى. بۇل تۋرالى پرەزيدەنت قاسىم-جومارت توقاەۆتىڭ قالاعا جۇمىس ساپارى بارىسىندا ايتىلدى، دەپ حابارلايدى ”ادىرنا” ۇلتتىق پورتالى.
اقوردا مالىمەتىنشە، قاسىم-جومارت توقاەۆ «Shymkent City» ساياباعىن ارالاپ كورگەن. پرەزيدەنت ساياباقتىڭ اۋماعى 20 گەكتاردان اساتىن پاركتەگى سۋبۇرقاق پەن جاساندى توعانىن، امفيتەاتر مەن لاندشافتتى اللەيالارىن، ۆوركاۋت جانە سكەيت الاڭدارىن ارالاپ كورگەن.
اكىمدىك وكىلدەرى پاركتىڭ ەكولوگيالىق جاعدايدى جاقسارتىپ، قالا تۇرعىندارىنا قولايلى ورتا قالىپتاستىرۋ ءۇشىن الداعى جىلدارى 1 ميلليون تۇپتەن استام اعاش كوشەتى وتىرعىزىلاتىنىن ايتقان.
سونىمەن بىرگە اكىمدىك وكىلدەرى شاھارداعى 12 ساياباقتى اباتتاندىرۋ، سونداي-اق گۇلزارلاردى، قوشقار اتا وزەنىنىڭ جاعالاۋى مەن ارىقتاردى تازالاۋ جۇمىستارى ءجۇرىپ جاتقانىن، بۇرىنعى قوقىس پوليگونىنىڭ ورنىندا ەكوپارك سالىناتىنىن مالىمدەگەن.
ال قالانى قوقىستان تازارتۋ ءۇشىن قالادا قوقىس ورتەيتىن زاۋىت سالىنادى. بۇل جوبانى قىتايلىق Shaanxi Construction Engineering كومپانياسى جۇزەگە اسىرادى.
«پرەزيدەنتكە قوقىس ورتەۋ زاۋىتىنىڭ جوباسى تانىستىرىلدى. زاۋىت تاۋلىگىنە 1 مىڭ تونناعا دەيىنگى قاتتى تۇرمىستىق قالدىقتاردى قايتا وڭدەپ، ەلەكتر ەنەرگياسىن وندىرە الادى»، – دەلىنگەن اقوردا حابارلاماسىندا.
