اقمولا وبلىسىندا ءبىلىم بەرۋ سالاسىندا جىل سايىن جۇيەلى جۇمىستار جۇرگىزىلىپ، جوسپار بويىنشا بولىنگەن قارجى ءتيىمدى يگەرىلەدى. بيىل وبلىستا ءبىلىم بەرۋ سالاسىنداعى ستراتەگيالىق قۇجاتتاردىڭ نەگىزگى ينديكاتورلارى مەن كورسەتكىشتەرىنە قول جەتكىزىلىپ، مەملەكەت باسشىسىنىڭ جولداۋىندا بەلگىلەنگەن مىندەتتەر جۇزەگە اسىرىلۋدا. بۇل تۋرالى وبلىستىق ءبىلىم باسقارماسىنىڭ باسشىسى ايناگۇل بالتاشەۆا بريفينگتە مالىمدەدى، دەپ حابارلايدى وڭىرلىك كوممۋنيكاتسيالار قىزمەتىنەن.
باسقارما باسشىسىنىڭ ايتۋىنشا، مەكتەپكە دەيىنگى ءبىلىم بەرۋ سالاسىندا 2024 جىلى 1,5 مىڭنان استام جاڭا ورىن قۇرۋ مىندەتى قويىلعان بولاتىن. بۇگىنگى تاڭدا 1964 ورىن قۇرىلدى، بۇل جوسپارلانعاننان 121%-عا كوپ، ياعني 341 ورىنعا ارتىق ورىندالدى. 2025 جىلى قوسىمشا 840 ورىندىق 3 بالاباقشا قۇرىلىسى اياقتالادى دەپ كۇتىلۋدە. وبلىس بويىنشا 597 مەكتەپكە دەيىنگى ءبىلىم بەرۋ ۇيىمىندا مەملەكەتتىك ءبىلىم بەرۋ تاپسىرىسى جۇزەگە اسىرىلىپ، اتا-انالارعا ورتاشا تولەم 17805 تەڭگە كولەمىندە بولدى. 2025 جىلدىڭ 1 قاڭتارىنان باستاپ بۇل سومانى 19052,4 تەڭگەگە دەيىن جەتكىزۋ جوسپارلانۋدا، بۇل مەكتەپكە دەيىنگى ۇيىمداردا تاماقتانۋدى جاقسارتۋعا مۇمكىندىك بەرەدى.
«ورتا ءبىلىم سالاسىندا 139 مىڭنان استام وقۋشى ءبىلىم الاتىن 534 مەكتەپ جۇمىس ىستەيدى، ال مەكتەپ كونتينگەنتى وتكەن وقۋ جىلىمەن سالىستىرعاندا 1,5 مىڭ وقۋشىعا ارتقان. وبلىستاعى 528 مەملەكەتتىك جالپى ءبىلىم بەرەتىن مەكتەپتىڭ 435-ءى اۋىلدىق جەرلەردە ورنالاسقان، ونىڭ 342-ءسى شاعىن جيناقتالعان مەكتەپتەر»، - دەدى ايناگۇل بالتاشەۆا.
بيىل وقۋ-اعارتۋ مينيسترلىگى 126 ماقساتتى مەكتەپتى انىقتاپ، ولاردىڭ پەداگوگتارىنىڭ بىلىكتىلىگىن ارتتىرۋ جانە زاماناۋي جابدىقتارمەن قامتاماسىز ەتۋ ءۇشىن جوبالار ىسكە اسىرىلۋدا. بۇل جوبالار اياسىندا 400-دەن استام پەداگوگ وقىتىلدى، ال 2025 جىلى قوسىمشا كۋرستار وتكىزۋ جوسپارلانعان.
«الەۋمەتتىك وسال وتباسىلاردان شىققان 8142 بالا جانە 56154 باستاۋىش سىنىپ وقۋشىسى تەگىن ىستىق تاماقپەن قامتىلعان. الەۋمەتتىك وسال وتباسىلاردان شىققان 10 مىڭنان استام بالاباقشا تاربيەلەنۋشىلەرىن تەگىن تاماقتاندىرۋ ءۇشىن وبلىستىق بيۋدجەتتەن 1,8 ميلليارد تەڭگە بولىنگەن. اقمولا وبلىسىندا مەكتەپتەردەگى تاماقتانۋ باعاسى 2025 جىلدىڭ باسىنان باستاپ ارتادى. جوسپار بويىنشا، تاماقتانۋ قۇنى ءبىر وقۋشىعا 715 تەڭگەدەن 808 تەڭگەگە دەيىن كوتەرىلمەك. بۇل وزگەرىس بالالاردىڭ تاماقتانۋ ساپاسىن جاقسارتۋعا باعىتتالعان»، - دەپ تولىقتىردى سپيكەر.
بيىل 10035 وقۋشى تاسىمالداۋمەن قامتاماسىز ەتىلگەن، ال 20 مەكتەپ اۆتوبۋسى ساتىپ الىندى. 2025 جىلى اۆتوبۋس پاركى تاعى 9 بىرلىككە تولىقتىرىلادى.
ەلىمىزدە «جايلى مەكتەپ» ۇلتتىق جوباسى اياسىندا بيىل 12 200 ورىندىق 9 ءبىلىم بەرۋ نىسانى سالىنۋى جوسپارلانعان بولاتىن، ونىڭ 6-ى قازىردىڭ وزىندە ىسكە قوسىلدى. قالعان 3 مەكتەپ جاقىن ارادا پايدالانۋعا بەرىلەدى. سونىمەن قاتار، وبلىستىق بيۋدجەتتەن 1200 ورىندىق مەكتەپ اشىلدى.
كوكشەتاۋ قالاسىندا 2 بالاباقشا مەن جوعارى تەحنيكالىق كوللەدج ءۇشىن 300 ورىندىق جاتاقحانا قۇرىلىسى اياقتالدى. جىل سوڭىنا دەيىن كوكشەتاۋ قالاسىندا تاعى ءبىر 300 ورىندىق جاتاقحانا ىسكە قوسىلادى.
وقىتۋ ءۇشىن قولايلى ورتانى قامتاماسىز ەتۋ ماقساتىندا اعىمداعى جىلى وبلىس بويىنشا 113 ءبىلىم بەرۋ نىسانىندا كۇردەلى جانە اعىمداعى جوندەۋ جۇمىستارى جۇرگىزىلدى. بۇل ماقساتتارعا وبلىستىق جانە رەسپۋبليكالىق بيۋدجەتتەن 12 ميلليارد تەڭگەدەن استام قارجى ءبولىندى. سونىمەن قاتار، ءۇش جىلدىق جوسپار اياسىندا 90 مەكتەپ جاڭارتىلىپ، زاماناۋي جابدىقتارمەن قامتاماسىز ەتىلۋدە.
ەرەكشە ءبىلىم بەرۋ قاجەتتىلىكتەرى بار 12 مىڭعا جۋىق بالا بار، ولاردىڭ 1817-ءسى مۇگەدەك بالالار. 2024 جىلى 28 ينكليۋزيانى قولداۋ كابينەتى اشىلىپ، قازىرگى تاڭدا وبلىستا 84 كابينەت جۇمىس ىستەيدى. سونىمەن قاتار، پسيحولوگيالىق قولداۋ ورتالىعى قۇرىلىپ، تاۋلىك بويى جۇمىس ىستەيتىن سەنىم تەلەفونى ىسكە قوسىلدى.
«تەحنيكالىق جانە كاسىپتىك ءبىلىم بەرۋ جۇيەسىندە وبلىستا 29 كوللەدج جۇمىس ىستەيدى، ونىڭ 83%-ى تەگىن وقۋمەن قامتىلعان. 2025 جىلى 5700 تالاپكەردى قابىلداۋ جوسپارلانىپ، ونىڭ 600-ءى نىسانالى دايارلىق شەڭبەرىندە قابىلدانادى»،- دەپ تۇيىندەدى ايناگۇل بالتاشەۆا.
جىل سايىن وبلىستا 23 مىڭنان استام پەداگوگ بىلىكتىلىگىن ارتتىرادى. بيىل 5 مىڭنان استام پەداگوگ بىلىكتىلىك ارتتىرۋ كۋرستارىنان ءوتتى. سونىمەن قاتار، قاراشا ايىندا كوكشەتاۋ قالاسىندا العاش رەت پەداگوگتار ءسامميتى ۇيىمداستىرىلدى. سەميناردا الەۋمەتتىك-ەموتسيونالدى وقىتۋ، ينكليۋزيۆتى ءبىلىم بەرۋ جانە ءبىلىم بەرۋ تەحنولوگيالارى سالاسىندا حالىقارالىق ساراپشىلاردىڭ ترەنينگتەرى وتكىزىلدى.
اقمولا وبلىسىنىڭ ءبىلىم بەرۋ جۇيەسى زاماناۋي تالاپتارعا ساي دامىپ، وقۋ ۇدەرىسىنە يننوۆاتسيالىق تەحنولوگيالار ەنگىزىلە وتىرىپ، بارلىق ءبىلىم بەرۋ دەڭگەيلەرىندە جوعارى ساپالى ءبىلىم بەرۋدى قامتاماسىز ەتۋ ماقساتىندا بەلسەندى جۇمىستار جۇرگىزىلۋدە.
