ۇلى جەڭىستىڭ 80 جىلدىعى اياسىندا تسەلينوگراد اۋدانىندا، قازاقتىڭ قاھارمان قىزى، كەڭەس وداعىنىڭ باتىرى ءاليا مولداعۇلوۆانىڭ 100 جىلدىعىنا ارنالعان تانىمال ءانشى، اكتەر، رەجيسسەر، دراماتۋرگ، اقىن، «ۇزدىك دراماتۋرگ» نوميناتسياسىنىڭ يەگەرى قانات ءجۇنىسوۆتىڭ «ءاليا» دراماسىمەن، تۇڭعىش حالىقتىق تەاترىنىڭ تۇساۋ كەسەرى ءوتتى.
حالىقتىق تەاترىنىڭ العاشقى قويىلىمىنىڭ كەيىپكەرلەرىن سومداعان اۋەسقوي اكتەرلار: مەملەكەتتىك قىزمەتكەرلەر، اۋداندىق مادەنيەت ءۇيىنىڭ قىزمەتكەرلەرى، 44813 اسكەري بولىمشەسىنىڭ قىزمەتكەرلەرى، مەكتەپ وقۋشىلارى جانە جەرگىلىكتى تۇرعىندار جوعارى دەڭگەيدە ساحنالاسا، ءاليا ءرولىن سومداعان اقمول اۋىلى مەكتەپ گيمنازياسىنىڭ وقۋشىسى بايراق گۇلجامال كورەرمەننىڭ ىستىق ىقىلاسىنا بولەندى.
ءاليا مولداعۇلوۆانىڭ تارتىسقا تولى قيىن كەزەڭدەگى تاعدىرىن، بيىك، قايتالانباس دارا تۇلعا ەكەندىگىن، مايدان دالاسىنا اتتانۋىن، مەرگەندەردى دايارلاۋ مەكتەبىنەن ءوتۋىن، جاۋىنگەر دوستارىمەن، بالالار ۇيىندەگى تاربيەشىلەرىمەن جانە كومانديرلەرىمەن قارىم-قاتىناسىن قويىلىم اۆتورى كوركەمدەپ بەينەلەسە، قويۋشى-رەجيسسەر ق.قۋانىشباەۆ اتىنداعى مەملەكەتتىك اكادەميالىق مۋزىكالىق دراما تەاترى رەجيسسەرىنىڭ كومەكشىسى، سونىمەن قاتار تسەلينوگراد اۋداندىق مادەنيەت ءۇيىنىڭ ۇيىرمە جەتەكىشىسى، «مادەنيەت سالاسىنىڭ ۇزدىگى» توسبەلگىسىنىڭ يەگەرى گۇلجان ابديباەۆا حالىققا شەبەر جەتكىزىپ، كورەرمەننىڭ جۇرەگىنە جول تاپتى.
ايتا كەتەتىن بولساق، ۇلى جەڭىستىڭ 80 جىلدىعىنا مەرەكەلەۋ اياسىندا، ۇرپاققا پاتريوتتىق سەزىمدى وياتۋ، تۋعان ەلگە، جەرگە دەگەن سۇيىسپەنشىلىكتى ارتتىرۋ، باتىرلارىمىزدىڭ ەرلىگىن ناسيحاتتاۋ ماقساتىندا اقمولا وبلىسىندا رەسپۋبليكالىق، وبلىستىق جانە اۋداندىق دەڭگەيدە 600-گە جۋىق ءىس-شارا جوسپارلانىپ، ونىڭ 400-دەن استامى وتكىزىلدى.
بۇگىنگى وتكەن «ءاليا» سپەكتاكلىنىڭ پرەمەراسى ءىس-شارا لەگىنىڭ تاماشا بولىگىنە اينالدى.
