كوكتەمنىڭ كەلۋىمەن اقمولا جانە سولتۇستىك قازاقستان وبلىستارىنىڭ سۋ ايدىندارى ەرەكشە رەجيمگە كوشەدى – بالىقتاردىڭ ۋىلدىرىق شاشۋ كەزەڭى باستالادى. بۇل ۋاقىتتا بالىقتار ۋىلدىرىق شاشىپ، كەز كەلگەن ادام ارالاسۋى ەكوجۇيەگە ەلەۋلى زيان كەلتىرۋى مۇمكىن. وسىعان بايلانىستى وڭىردە بالىق اۋلاۋعا ماۋسىمدىق تىيىمدار كۇشىنە ەندى. بۇل تۋرالى بريفينگتە ەسىل وڭىرارالىق باسسەيندىك بالىق شارۋاشىلىعى ينسپەكتسياسىنىڭ اقمولا وبلىسى بويىنشا بالىق ينسپەكتسياسى ءبولىمىنىڭ باسشىسى نۇرلان تولەگەن ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
ينسپەكتسيا وكىلى اتاپ وتكەندەي، شەكتەۋلەر قر اۋىل شارۋاشىلىعى مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىنىڭ بۇيرىعىنا سايكەس قولدانىلادى. قۇجات الداعى ايلاردا بالىق اۋلاۋعا تولىق تىيىم سالىناتىن كەزەڭدەر مەن ورىنداردى رەتتەيدى. بۇل كاسىپتىك جانە اۋەسقوي بالىق اۋلاۋعا قاتىستى.
«ءساۋىردىڭ ورتاسىنان باستاپ، شورتان، ياز، كوكسەركە جانە باسقا دا بالىق تۇرلەرى، سونداي-اق وزەن شاياندارى، گاممارۋس جانە ارتەميا تسيستالارى ەرەكشە قورعاۋعا الىنادى. ەسىل، نۇرا، سىلەتى وزەندەرىندە، سونداي-اق ولاردىڭ بارلىق سالالارىندا جانە سۋ قويمالارىندا بالىق اۋلاۋعا جەكە تىيىم سالىنادى. بۇل شارالار سۋ جانۋارلارىنىڭ تۇرىنە بايلانىستى ءارتۇرلى مەرزىمدە ارەكەت ەتەدى، بىراق ولاردىڭ باستى ماقساتى – كوبەيۋ مەن پوپۋلياتسيانى قالپىنا كەلتىرۋگە قاۋىپسىز جاعداي جاساۋ»، – دەپ حابارلادى بالىق ينسپەكتسياسى ءبولىمىنىڭ باسشىسى.
نۇرلان ولجابايۇلى «نەرەست» اكتسياسى جىل سايىن وتكىزىلىپ، تەك سۋ ايدىندارىندا باقىلاۋدى قامتاماسىز ەتۋدى عانا ەمەس، سونىمەن قاتار ازاماتتاردىڭ تابيعاتتى ساقتاۋ ماسەلەلەرىنە نازارىن اۋدارۋدى ماقسات ەتەدى. ونىڭ ايتۋىنشا، بالىق رەسۋرستارىن قورعاۋ – تەك ينسپەكتورلاردىڭ مىندەتى ەمەس، ءاربىر تۇرعىننىڭ جاۋاپكەرشىلىگى. سپيكەر كەز كەلگەن زاڭ بۇزۋشىلىقتار، زاڭسىز بالىق اۋلاۋ نەمەسە تىرشىلىك ەتۋ ورتاسىن جويۋ اكىمشىلىك، ال كەيبىر جاعدايلاردا قىلمىستىق جاۋاپكەرشىلىككە اكەلەتىنىن اتاپ ءوتتى.
ينسپەكتسيا تۇرعىندارعا مۇقيات بولۋعا، بەلگىلەنگەن ەرەجەلەردى ساقتاۋعا جانە براكونەرلىككە جول بەرمەۋگە شاقىرادى. تىيىم سالىنعان مەرزىمدەر مەن ورىندار تۋرالى تولىعىراق اقپاراتتى adilet.zan.kz سايتىنان الۋعا بولادى.
ەگەر ءسىز زاڭسىز بالىق اۋلاۋدىڭ كۋاسى بولساڭىز، بەي-جاي قالماڭىز. زاڭ بۇزۋشىلىقتار تۋرالى كەلەسى جەدەل جەلى نومىرلەرى ارقىلى حابارلاۋعا بولادى: اقمولا وبلىسى – 8 (7162) 31-00-04, سولتۇستىك قازاقستان وبلىسى – 8 (7152) 36-10-45 جانە 8 (705) 653-35-25.
