بۇگىن وسكەمەن قالاسىنىڭ ب.الەكساندروۆ اتىنداعى سپورت سارايىندا قازاقستان رەسپۋبليكاسىنىڭ VI قىسقى سپارتاكياداسىنىڭ جابىلۋ سالتاناتى ءوتتى. قورىتىندى بويىنشا اقمولا وبلىسى ءبىرىنشى ورىندى جەڭىپ الدى.
جارىستار اقپان ايىنان ءساۋىر ايىنا دەيىن 13 سپورت تۇرىنەن وتكىزىلدى. قورىتىندى بارلىق سپورت تۇرىنەن سپورتشىلار جەڭىپ العان التىن مەدال سانى بويىنشا جاسالدى. اقمولا وبلىسىنىڭ قورجىنىندا 29 مەدال، ونىڭ ىشىندە: 16 التىن، 9 كۇمىس جانە 4 قولا، ەكىنشى ورىندى استانا قالاسىنىڭ سپورتشىلارى يەلەندى، ال قوستاناي وبلىسى ءۇشىنشى ورىننان كورىندى.
ەستەرىڭىزگە سالا كەتەيىك، سپارتاكيادانىڭ سالتاناتتى اشىلۋى 18 ناۋرىز كۇنى ششۋچينسك قالاسىندا بولدى، ءدال بۇل جەردە اقمولالىق سپورتشىلاردىڭ ەڭ جارقىن جەڭىستەرى باستالعان ەدى.
سپارتاكيدا – بۇل ەل اۋقىمىنداعى كىشى وليمپيادا ويىندارى، سەبەبى ءتورت جىلدا ءبىر رەت وتەدى!
وتكەن سپارتاكيادادا اقمولا وبلىسى 3-ءشى جالپىكوماندالىق ورىنعا يە بولعان ەدى، ال بيىل تۇعىردىڭ جوعارعى مىنبەسىنە جايعاستى!
سپارتاكيادانىڭ ماقساتى سالاۋاتتى ءومىر سالتىن قالىپتاستىرۋدىڭ ماڭىزدى فاكتورى رەتىندە دەنە شىنىقتىرۋ مەن سپورتتى ناسيحاتتاۋ، سونداي-اق قازاقستان رەسپۋبليكاسى ۇلتتىق قۇراما كوماندالارىن جيناقتاۋ ءۇشىن قىسقى سپورت تۇرلەرىنەن ەڭ مىقتى دەگەن سپورتشىلاردى انىقتاۋ جانە حالىقارالىق جارىستارعا، سونىڭ ىشىندە يتاليا ەلىنىڭ ميلان جانە كورتينا د’امپەتستسي قالالارىندا وتەتىن 2026 جىلعى قىسقى وليمپيادا ويىندارىنا دايىندالىپ، قاتىسۋ بولىپ تابىلادى.
