اقمولا وبلىسىندا ءورت قاۋپى جوعارى كەزەڭ باستالعالى بەرى ءبىر ورمان ءورتى جانە 44 ءشوپ جانۋ وقيعاسى تىركەلدى. جالپى ءورت شالعان اۋماق 689,31 گەكتاردى قۇرادى. ماۋسىم سالىستىرمالى تۇردە تىنىش وتسە دە، توتەنشە جاعدايلار قىزمەتى كەز كەلگەن جاعدايعا دايىن بولۋ ءۇشىن جۇمىسىن كۇشەيتىلگەن رەجيمدە جالعاستىرۋدا. بۇل تۋرالى بريفينگ بارىسىندا اقمولا وبلىسى تجد مەملەكەتتىك ءورت باقىلاۋ باسقارماسىنىڭ باس مامانى ازاماتتىق قورعاۋ كاپيتانى دوسبول جاقسىباەۆ ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
الدىن الۋ ماقساتىندا اقپاراتتىق-ءتۇسىندىرۋ جۇمىستارى كەڭ كولەمدە جۇرگىزىلۋدە. ءورتتىڭ الدىن الۋ جانە ءورت شىققان جاعدايدا قالاي ارەكەت ەتۋ كەرەكتىگى تۋرالى حالىققا ءتۇسىندىرۋ ءۇشىن وڭىرلىك جانە رەسپۋبليكالىق بۇقارالىق اقپارات قۇرالدارىندا 78 ماتەريال جارىق كوردى.
«جاڭا ءورت ماۋسىمىنىڭ الدىندا تج دەپارتامەنتى جاعداي ۋشىعاتىن بولسا، ىسكە قوسىلاتىن كۇشتەر مەن قۇرالداردىڭ ناقتى ءتىزىمىن بەكىتتى. جالپى سانى 1000-نان استام ادام جانە 262 تەحنيكا كەز كەلگەن ساتتە وقيعا ورنىنا جىبەرىلۋگە دايىن. ولاردىڭ قاتارىندا تجد، پوليتسيا، تابيعي رەسۋرستار باسقارماسى، اسكەري بولىمدەر، جەرگىلىكتى اتقارۋشى ورگاندار، تەمىرجول جانە جول قىزمەتىنىڭ وكىلدەرى بار. سونىمەن قاتار، وبلىستا 6 ءورت پويىزى بار، بۇل اسىرەسە تەمىرجول ينفراقۇرىلىمىن قورعاۋدا ماڭىزدى»، – دەدى سپيكەر.
ورتپەن كۇرەستە ەرىكتى جاساقتاردىڭ ۇلەسى زور. قازىرگى تاڭدا وڭىردە 1000-نان استام ادامنان قۇرالعان 210 ەرىكتى جاساق جۇمىس ىستەيدى. بۇعان قوسا، 51 جەرگىلىكتى اتقارۋشى ورگاننىڭ ءورت ءسوندىرۋ بەكەتى بار. ولار الىس اۋىلداردا جانە ەلدى مەكەندەردە ءورتتىڭ العاشقى بەلگىلەرى بايقالعان ساتتە جىلدام ارەكەت ەتۋگە ءتيىس.
ءورت وشاقتارىن ەرتە انىقتاۋ ءۇشىن سپۋتنيكتىك مونيتورينگ قولدانىلادى. «قازاقستان عارىش ساپارى» اق اپتالىق بولجاممەن بىرگە ءورت قاۋپى يندەكسىنىڭ كارتاسىن ۇسىنادى. mchs.gharysh.kz گەوپورتالى ارقىلى ورمان قورى، سۋ كوزدەرى، ءورت بولىمشەلەرى مەن ەۆاكۋاتسيالىق بەكەتتەر سياقتى ماڭىزدى نىسانداردى، سونداي-اق ناقتى جاعدايدى قاداعالاۋعا بولادى. مۇنداي تسيفرلىق جۇيە توتەنشە جاعدايلاردا شۇعىل شەشىم قابىلداۋعا مۇمكىندىك بەرەدى.
جەرگىلىكتى جەرلەردە جاعدايدى 108 ءموبيلدى توپ باقىلايدى. بۇل – ورمان جانە دالا القاپتارىن، دەمالىس ورىندارىن پاترۋلدەيتىن 425 قىزمەتكەر. 22 رەيد بارىسىندا ءورت قاۋىپسىزدىگى ەرەجەلەرىن بۇزۋدىڭ بەس فاكتىسى انىقتالدى. ءۇش ازاماتقا ەسكەرتۋ جاسالدى، ال ەكەۋى 78 640 تەڭگە كولەمىندە ايىپپۇل تولەدى.
«الدىن الۋدىڭ باستى شارتى – ءار ادامنىڭ جەكە جاۋاپكەرشىلىگى. دالا يەسى، تۋريست نەمەسە باعبان — ءبارى بىردەي اباي بولۋعا مىندەتتى. ءبىر عانا بەيقام ارەكەتتەن ۇلكەن ءورت تۋىنداپ، ونىڭ زاردابىن بولجاۋ قيىن بولۋى مۇمكىن. جەر جىرتۋ، قۇرعاق ءشوپتى قاۋىپسىز جاعۋ، ىستىق ءارى جەلدى كۇنى وت جاقپاۋ، قوقىستى ۋاقتىلى تازارتۋ سياقتى قاراپايىم ەرەجەلەر كوپتەگەن گەكتار جەردى جانە تالاي ادامنىڭ ءومىرىن ساقتاپ قالۋى مۇمكىن»، – دەپ تۇيىندەدى مامان.
