جاڭا جىل قارساڭىندا الماتىدا ەلىمىزدىڭ ءار وڭىرىنەن جينالعان تالانتتى جاستاردى بىرىكتىرگەن AUYL SPORT-2024 رەسپۋبليكالىق ءتۋرنيرى ءوز مارەسىنە جەتتى. «Halyk» قايىرىمدىلىق قورى ۇيىمداستىرعان بۇل اۋقىمدى جوبا اۋىلدان شىققان بالالارعا ۇلكەن مۇمكىندىكتەر سىيلاپ، ولاردىڭ دارىندارىن كورسەتۋىنە جول اشتى.
AUYL SPORT جوباسى ءۇش اي بۇرىن باستاۋ الدى. جوبانىڭ العاشقى كەزەڭىندە ەلىمىزدىڭ 200 اۋىلىنان 12 مىڭنان استام بالا مەن ءجاسوسپىرىم قاتىسقان وبلىستىق ىرىكتەۋ تۋرنيرلەرى ءوتتى. فينالعا ءار وبلىستىڭ ەڭ ۇزدىك سپورتشىلارى جينالدى. ءتۋرنيردىڭ نەگىزگى ماقساتى – اۋىل بالالارىنا سەنىم ۇيالاتىپ، ۇلكەن جەتىستىكتەرگە باستاۋ بولاتىن مۇمكىندىكتەر بەرۋ.
«AUYL SPORT – بۇل جاي جارىس ەمەس، اۋىل بالالارىنىڭ جاڭا كوكجيەكتەرىن اشاتىن شابىت الاڭى. ءبىز ولاردىڭ ارمانىن قولدايمىز جانە بولاشاعىنا سەنەمىز»، – دەيدى «Halyk» قورىنىڭ الماتى فيليالىنىڭ ديرەكتورى عالىمبەك جاقسىلىقوۆ.
ءتۋرنيردىڭ فينالىندا سپورتشىلار بوكس، كۇرەس، كاراتە، باسكەتبول، ۆولەيبول جانە شاحمات بويىنشا باق سىنادى. بۇل جارىسقا قاتىسۋشىلاردىڭ كوبىسى ءۇشىن ۇلكەن ارەناعا شىعۋ – العاشقى تاجىريبە.
«اۋىل بالالارىنا ءىرى تۋرنيرلەرگە قاتىسۋ قيىنعا سوعادى. سوندىقتان «Halyk» قورىنىڭ قولداۋى ولاردىڭ سپورتتاعى العاشقى قادامىن جاساۋىنا مۇمكىندىك بەردى. ءبىزدىڭ وليمپيادا چەمپيوندارىنىڭ كوپشىلىگى اۋىلدان شىققانىن ۇمىتپاۋىمىز كەرەك»، – دەيدى ەركىن كۇرەستەن باس تورەشى بەرىك شالاباەۆ.
فينالدىق كەزەڭدە تۇركىستان وبلىسىنان كەلگەن جاس پالۋان سامير راحماناليەۆ جەڭىمپاز اتانىپ، قۋانىشىمەن ءبولىستى.
«مەن ءوز اتىمدى، اۋىلىمنىڭ اتىن اسقاقتاتا العانىما شەكسىز قۋانىشتىمىن! بۇل مەن ءۇشىن ەڭ ۇلكەن سپورتتىق ءىس-شارا بولدى. ەموتسيالارىمدى سوزبەن ايتىپ جەتكىزۋ مۇمكىن ەمەس!» - دەدى ول.
13 جاستاعى اتىراۋ وبلىسى، تاسقالا اۋدانىنىڭ جاس سپورتشىسى سەرىك ءامىر ەركىن كۇرەستەن 35 كگ سالماقتا جۇلدەلى ءبىرىنشى ورىندى جەڭىپ الىپ، ءوزىنىڭ جەتىستىگىمەن ءبولىستى.
«مەن 6 جىلدان بەرى ەركىن كۇرەسپەن اينالىسىپ كەلەمىن. بۇعان دەيىن وزبەكستان مەن بەلارۋس ەلدەرىندە وتكەن جارىستارعا قاتىسىپ، جۇلدەلى ورىندارعا يە بولعانمىن. بۇل تۋرنير دە مەن ءۇشىن جەمىستى بولدى»، - دەپ قۋاندى قازاقستاننىڭ ەركىن كۇرەستەن چەمپيونى.
AUYL SPORT جوباسى «Halyk» قورىنىڭ اۋىلدىق جەرلەردەگى بۇقارالىق سپورتتى دامىتۋعا باعىتتالعان نەگىزگى باستامالارىنىڭ ءبىرى. تەك وسى جوباعا 500 ميلليون تەڭگە ءبولىنىپ، بالالاردىڭ سپورتقا دەگەن قىزىعۋشىلىعىن ارتتىرۋعا جاعداي جاسالدى.
«ءبىزدىڭ ماقساتىمىز – قاي جەردە تۇراتىنىنا قاراماستان بارلىق بالالارعا تەڭ مۇمكىندىكتەر جاساۋ. مۇنداي باستامالار جاس ۇرپاقتىڭ وزىنە دەگەن سەنىمىن نىعايتىپ، ومىردەگى ۇلكەن جەتىستىكتەرگە جول اشادى»، – دەيدى عالىمبەك جاقسىلىقوۆ.
AUYL SPORT جوباسى اۋىل بالالارىنا كاسىبي سپورت الەمىمەن تانىسۋعا مۇمكىندىك بەرىپ، ولاردىڭ ارماندارىنا قانات ءبىتىردى. تۋرنير تەك جارىس ەمەس، بالالار مەن ولاردىڭ وتباسىلارى ءۇشىن ءومىردى وزگەرتەتىن جاڭا قادام بولدى.
ۇيىمداستىرۋشىلاردىڭ سوزىنشە، تۋرنير بولاشاق چەمپيونداردى تاربيەلەۋدىڭ ماڭىزدى الاڭىنا اينالدى. AUYL SPORT – اۋىلدان ۇلكەن ارمانعا جول اشاتىن پلاتفورما.
جاس سپورتشىلاردىڭ تابىسى ولاردىڭ تاباندىلىعى مەن كۇش-جىگەرىنىڭ جەمىسى ەكەنىن كورسەتتى. AUYL SPORT – قازاقستاننىڭ جارقىن بولاشاعىن قالىپتاستىراتىن ۇرپاققا سەنىم مەن شابىت سىيلاعان جوبا بولدى.
