20 جىلدىققا - 20-التىن مەدال. تالدىقورعاندىق قىزدار «جەتىسۋ» ۆولەيبول كلۋبىنىڭ مەرەيتويىنا تاماشا تارتۋ جاسادى. جۋىردا پەتروپاۆلدا 23 جاسقا دەيىنگى ايەلدەر اراسىندا وتكەن ەل بىرىنشىلىگىندە توپ جاردى. وسىلايشا، «جەتىسۋ-2» كومانداسى ەكىنشى جىل قاتارىنان چەمپيون اتاندى،
الماتى وبلىسىنىڭ «جەتىسۋ-2» قىزدار ۆولەيبول كلۋبى قازىر ناعىز بابىندا. جوعارى ليگاداعى ەڭ ۇزدىك كوماندا. جۋىردا پەتروپاۆلدا وتكەن ەل بىرىنشىلىگىندە ەكىنشى جىل قاتارىنان چەمپيون اتاندى. 5 تۋرعا سوزىلعان باسەكەدە 35 ويىننىڭ بارلىعىن جەڭىپ، بۇرىن-سوڭدى بولماعان ۇزدىك ناتيجە كورسەتتى. وسىلايشا، كوماندا مۇشەلەرى، ياعني 14 ويىنشىنىڭ بارلىعى دا سپورت شەبەرلىگىنە قول جەتكىزدى.
نياز جانتىلەۋوۆ “جەتىسۋ-2” ۆولەيبول كلۋبىنىڭ اعا جاتتىقتىرۋشىسى:
“بىزدىڭ كلۋبىمىزدىڭ اشىلعانىنا – 20 جىل. 20 جىلدىققا – 20-مەدال. چەمپيون بولدىق. 5-تۋر 29-چەمپيونات قارساڭىندا 35 ويىن بولدى، جالپى 35 ويىندا ءبىزدىڭ قىزدار بىردە-ءبىر ويىندا ۇتىلمادى، 102 وچكو الدى. تاريحي ءسات دەسە بولادى. تىركەپ قوياتىن دا شىعار” - دەپ بۇل جەڭىسكە ەرەكشە قۋانىشتى ەكەنىن جەتكىزدى.
جالپى 20 جىلدىق تاريحى بار «جەتىسۋ» ۆولەيبول كلۋبىنىڭ جەتكەن جەتىستىگى دە از ەمەس. ايەلدەر اراسىندا 8 دۇركىن قازاقستان چەمپيونى، 8 مارتە ەل كۋبوگىنىڭ يەگەرى اتاندى. سونىمەن قاتار جاستار مەن جاسوسپىرىمدەر كوماندالارى دا وبلىس نامىسىن ابىرويمەن قورعاپ ءجۇر. ءبىر سوزبەن ايتقاندا، لايىقتى ءىزباسارلار ءوسىپ كەلەدى. ال ولاردىڭ الاڭسىز دايىندالۋىنا وبلىس باسشىلىعى تاراپىنان دا قولداۋ زور.
“4 جىل وسى كلۋبتا ويناپ كەلە جاتىرمىن. وسى «جەتىسۋ» كومانداسىندا بۇكىل جاعدايلار جاسالعان. تۇراتىن جەرىمىز، قارجى، وقۋ ورنىمىز، ءبارى قاراستىرىلعان. مەنىڭ ارمانىم – ۇلتتىق ليگادا جانە دە وسى قازاقستان قۇراما كومانداسىنىڭ ويىنشىسى بولعىم كەلەدى”- دەيدى “جەتىسۋ-2” ۆولەيبول كلۋبىنىڭ ويىنشىسى زارينا مۋباراكزيانوۆا.
«جەتىسۋ-2» كومانداسى الداعى ۋاقىتتا ۇلتتىق ليگاعا ءوتۋدى ماقسات ەتىپ وتىر. سوندىقتان كەلەسى ماۋسىمعا قىزۋ دايىندىق ۇستىندە. ونىڭ ۇستىنە كلۋبتىڭ 10 ويىنشىسى جۋىردا وتەتىن ۋنيۆەرسيادادا ءوڭىر نامىسىن قورعاپ، چەمپيوندىق اتاقتى ساقتاپ قالۋعا كۇش سالماق.
