استانادا قازاقستاننىڭ ادەبيەتى مەن مادەنيەتىنىڭ جارىق جۇلدىزى، حالىق جازۋشىسى ءارى دراماتۋرگ ءابىش كەكىلبايۇلىنىڭ 85 جىلدىق مەرەيتويىنا ارنالعان تاعىلىمدى شارالار لەگىنىڭ قورىتىندى كەشى ءوتتى. بۇل قورىتىندى جيىن — جازۋشىنىڭ رۋحاني مۇراسىن ۇلىقتاپ، ونىڭ قازاق ادەبيەتى مەن ونەرىندەگى ورنىن كورسەتتى.
ءىس-شارانىڭ شىمىلدىعى ءابىش كەكىلبايۇلىنىڭ ء“بىر شوكىم بۇلت”، “كۇي”، “شىڭىراۋ” اتتى ەڭ كورنەكتى شىعارمالارىنا نەگىزدەلگەن قويىلىمدارمەن اشىلىپ، كورەرمەندەردى تەرەڭ ويعا جەتەلەدى. تەاتر ساحناسىندا كاسىبي اكتەرلەر سومداعان بەينەلەر ارقىلى جازۋشىنىڭ جان دۇنيەسى مەن شىعارماشىلىق قۋاتى كورىنىس تاپتى. ن.ءجانتورين اتىنداعى ماڭعىستاۋ وبلىستىق مۋزىكالىق دراما تەاترىنىڭ باسشىسى ءابىش كەكىلباەۆتىڭ تۋىندىلارى ساحنالاۋ كەزىندە اۆتوردىڭ ىشكى سەزىمدەرىن جەتكىزۋ قيىندىق تۋعىزاتىن ەرەكشە شىعارمالار ەكەنىن اتاپ ءوتتى.
ء“ابىش اتامىزدىڭ شىعارمالارىندا اتا-اناعا قۇرمەت، بالا تاربيەسى، قوعامدا بولىپ جاتقان پروبلەمالار سۋرەتتەلگەن. قوعامعا قىرىق قاتپار وي تاستاپ، پايداسىن بەرەدى دەپ ويلايمىن. مەن ءابىش اتامىزدى ءبىر ءسوزى ءبىر سوزىنە ۇقسامايتىن پەندە ەمەس اۋليە كىسى دەر ەدىم. ويتكەنى جازۋعا بەرىلگەنى سونشالىق ماتەريالدىق، دۇنيەلىك زاتتارعا ءمان بەرمەيتىن، ءتىپتى تۇرعان ءۇيىنىڭ مەكەن-جايىن بىلمەگەن. سوندىقتان شىعارمالارى تەڭىزدىڭ تۇڭعيىعىنا باتىراتىن بولەك الەم.”، - دەيدى ايدوس تاستاەۆ
سونىمەن قاتار، وسى شارا بارىسىندا ءابىش كەكىلبايۇلىنىڭ الەمدىك وقىرمانعا جول تارتقان جاڭا باسىلىمىنىڭ تۇساۋكەسەرى ءوتتى. تۇرىك تىلىنە اۋدارىلعان “كۇي” شىعارماسى ەرەكشە نازار اۋدارىپ، ۇلت ادەبيەتىنىڭ شەكارادان اسىپ، مادەنيەتتەر توعىسىندا تانىلۋىن تاعى ءبىر ايقىندادى.
““كۇي” شىعارماسىنىڭ تۇرىك تىلىنە اۋدارىلۋى ەكى ەلدىڭ بايلانىسۋىنا ىقپال ەتەدى. قازاق جانە تۇرىك ەلىنىڭ ءتىلى، ءدىنى، تاريحى، بولمىسى ءبىر بولعاننان كەيىن بۇل شىعارما تۇرىك حالقىنا ۇلكەن سەپتىگىن تيگىزەدى دەگەن ويدامىن.”، - دەيدى ايدوس تاستاەۆ.
بۇل قورىتىندى شارا ءابىش مۇراسىنىڭ تەك قازاق حالقىنا عانا ەمەس، الەمدىك وركەنيەتكە دە ورتاق رۋحاني بايلىق ەكەنىن سەزىندىرىپ، ۇلت مادەنيەتىنىڭ اسقاقتاي بەرۋىنە سەرپىن بەردى.
