Astanada Qazaqstannyń ádebıeti men mádenıetiniń jaryq juldyzy, halyq jazýshysy ári dramatýrg Ábish Kekilbaıulynyń 85 jyldyq mereıtoıyna arnalǵan taǵylymdy sharalar leginiń qorytyndy keshi ótti. Bul qorytyndy jıyn — jazýshynyń rýhanı murasyn ulyqtap, onyń qazaq ádebıeti men ónerindegi ornyn kórsetti.
Is-sharanyń shymyldyǵy Ábish Kekilbaıulynyń “Bir shókim bult”, “Kúı”, “Shyńyraý” atty eń kórnekti shyǵarmalaryna negizdelgen qoıylymdarmen ashylyp, kórermenderdi tereń oıǵa jeteledi. Teatr sahnasynda kásibı akterler somdaǵan beıneler arqyly jazýshynyń jan dúnıesi men shyǵarmashylyq qýaty kórinis tapty. N.Jantórın atyndaǵy Mańǵystaý oblystyq mýzykalyq drama teatrynyń basshysy Ábish Kekilbaevtyń týyndylary sahnalaý kezinde avtordyń ishki sezimderin jetkizý qıyndyq týǵyzatyn erekshe shyǵarmalar ekenin atap ótti.
“Ábish atamyzdyń shyǵarmalarynda ata-anaǵa qurmet, bala tárbıesi, qoǵamda bolyp jatqan problemalar sýrettelgen. Qoǵamǵa qyryq qatpar oı tastap, paıdasyn beredi dep oılaımyn. Men Ábish atamyzdy bir sózi bir sózine uqsamaıtyn pende emes áýlıe kisi der edim. Óıtkeni jazýǵa berilgeni sonshalyq materıaldyq, dúnıelik zattarǵa mán bermeıtin, tipti turǵan úıiniń meken-jaıyn bilmegen. Sondyqtan shyǵarmalary teńizdiń tuńǵıyǵyna batyratyn bólek álem.”, - deıdi Aıdos Tastaev
Sonymen qatar, osy shara barysynda Ábish Kekilbaıulynyń álemdik oqyrmanǵa jol tartqan jańa basylymynyń tusaýkeseri ótti. Túrik tiline aýdarylǵan “Kúı” shyǵarmasy erekshe nazar aýdaryp, ult ádebıetiniń shekaradan asyp, mádenıetter toǵysynda tanylýyn taǵy bir aıqyndady.
““Kúı” shyǵarmasynyń túrik tiline aýdarylýy eki eldiń baılanysýyna yqpal etedi. Qazaq jáne túrik eliniń tili, dini, tarıhy, bolmysy bir bolǵannan keıin bul shyǵarma túrik halqyna úlken septigin tıgizedi degen oıdamyn.”, - deıdi Aıdos Tastaev.
Bul qorytyndy shara Ábish murasynyń tek qazaq halqyna ǵana emes, álemdik órkenıetke de ortaq rýhanı baılyq ekenin sezindirip, ult mádenıetiniń asqaqtaı berýine serpin berdi.
