اتىراۋ مۇناي وڭدەۋ زاۋىتىنىڭ باس ديرەكتورى عالىمجان جۋسانباەۆ ءوز ءوتىنىشى بويىنشا قىزمەتىنەن كەتۋگە ارىز جازدى، دەپ حابارلايدى «ادىرنا» ءتىلشىسى orda.kz-كە سىلتەمە جاساپ.
«ول «قازمۇنايگاز» باسشىلىعىمەن جۇمىستان بوساتۋ شارتتارىن كەلىسىپ جاتىر-مىس. اتىراۋ مۇناي وڭدەۋ زاۋىتىندا جۇمىس ىستەيتىن دەرەككوزدىڭ ايتۋىنشا، عالىمجان جۋسانباەۆ قمگ باسقارما توراعاسى اسحات حاسەنوۆپەن سويلەسكەن. ولار باس ديرەكتور اۋىسقاننان كەيىن جۋسانباەۆ پەن زاۋىت اراسىنداعى ىقتيمال قارىم-قاتىناستى تالقىلاعان بولۋى مۇمكىن. جۇمىستان بوساتۋ تۋرالى ماسەلە ءالى شەشىلگەن جوق»،—دەلىنگەن حابارلامادا.
قمگ ءباسپاسوز حاتشىسى ەرلان سيسەنوۆ كوپشىلىكتى رەسمي كوزدەردەن الىنعان اقپاراتقا سەنۋگە شاقىردى.
«اتىراۋ مۇناي وڭدەۋ زاۋىتىنىڭ باس ديرەكتورى عالىمجان جۋسانباەۆتىڭ قىزمەتىنەن كەتۋى مۇمكىن دەگەن اقپارات تارالۋدا. تەك رەسمي كوزدەردەن الىنعان اقپاراتقا سەنىڭىز. اتىراۋ مۇناي وڭدەۋ زاۋىتىنىڭ جۇمىسىنا كەلەتىن بولساق، زاۋىت قالىپتى جۇمىس ىستەپ تۇر»،—دەدى ول.
ايتا كەتەيىك، عالىمجان جۋسانباەۆ 2024 جىلدىڭ 10 قاڭتارىندا اتىراۋ مۇناي وڭدەۋ زاۋىتىنىڭ باس ديرەكتورى لاۋازىمىنا تاعايىندالعان ەدى. 16 اقپاندا زاۋىتتىڭ باس ينجەنەرى ادىلەت شوشانباسوۆ جاڭا باس ديرەكتوردى زاۋىتتا قاۋىرت جاعداي جاسادى، بالاعات سوزدەر ايتتى جانە كاسىپورىن باسشىلىعى تاراپىنان ىقتيمال قارجىلىق ۇرلىق جاسادى دەپ ايىپتادى.
عالىمجان جۋسانباەۆ بۇل مالىمدەمەگە پىكىر ءبىلدىرىپ، پرەزيدەنت قاسىم-جومارت توقاەۆقا ەسكى كلاننىڭ بيلىككە كەدەرگى كەلتىرىپ وتىرعانىن جەتكىزدى. بۇل داۋ بويىنشا «قازمۇنايگاز» تاراپىنان قۇرىلعان كوميسسيا تەكسەرۋ جۇمىستارىن جۇرگىزىپ، 19 اقپاندا جۋسانباەۆ قىزمەتىنەن بوساتىلدى.
21 ماۋسىمدا استانا سوتى جۋسانباەۆتى اتىراۋ مۇناي وڭدەۋ زاۋىتىنىڭ باس ديرەكتورى قىزمەتىنە قايتارعانى بەلگىلى بولدى.
