Atyraý munaı óńdeý zaýytynyń bas dırektory Ǵalymjan Jýsanbaev óz ótinishi boıynsha qyzmetinen ketýge aryz jazdy, dep habarlaıdy «Adyrna» tilshisi orda.kz-ke silteme jasap.
«Ol «QazMunaıGaz» basshylyǵymen jumystan bosatý sharttaryn kelisip jatyr-mys. Atyraý munaı óńdeý zaýytynda jumys isteıtin derekkózdiń aıtýynsha, Ǵalymjan Jýsanbaev QMG basqarma tóraǵasy Ashat Hasenovpen sóılesken. Olar bas dırektor aýysqannan keıin Jýsanbaev pen zaýyt arasyndaǵy yqtımal qarym-qatynasty talqylaǵan bolýy múmkin. Jumystan bosatý týraly másele áli sheshilgen joq»,—delingen habarlamada.
QMG baspasóz hatshysy Erlan Sısenov kópshilikti resmı kózderden alynǵan aqparatqa senýge shaqyrdy.
«Atyraý munaı óńdeý zaýytynyń bas dırektory Ǵalymjan Jýsanbaevtyń qyzmetinen ketýi múmkin degen aqparat taralýda. Tek resmı kózderden alynǵan aqparatqa senińiz. Atyraý munaı óńdeý zaýytynyń jumysyna keletin bolsaq, zaýyt qalypty jumys istep tur»,—dedi ol.
Aıta keteıik, Ǵalymjan Jýsanbaev 2024 jyldyń 10 qańtarynda Atyraý munaı óńdeý zaýytynyń bas dırektory laýazymyna taǵaıyndalǵan edi. 16 aqpanda zaýyttyń bas ınjeneri Ádilet Shoshanbasov jańa bas dırektordy zaýytta qaýyrt jaǵdaı jasady, balaǵat sózder aıtty jáne kásiporyn basshylyǵy tarapynan yqtımal qarjylyq urlyq jasady dep aıyptady.
Ǵalymjan Jýsanbaev bul málimdemege pikir bildirip, prezıdent Qasym-Jomart Toqaevqa eski klannyń bılikke kedergi keltirip otyrǵanyn jetkizdi. Bul daý boıynsha «QazMunaıGaz» tarapynan qurylǵan komıssııa tekserý jumystaryn júrgizip, 19 aqpanda Jýsanbaev qyzmetinen bosatyldy.
21 maýsymda Astana soty Jýsanbaevty Atyraý munaı óńdeý zaýytynyń bas dırektory qyzmetine qaıtarǵany belgili boldy.
