Atyrau mūnai öŋdeu zauytynyŋ bas direktory Ǧalymjan Jusanbaev öz ötınışı boiynşa qyzmetınen ketuge aryz jazdy, dep habarlaidy «Adyrna» tılşısı orda.kz-ke sılteme jasap.
«Ol «QazMūnaiGaz» basşylyǧymen jūmystan bosatu şarttaryn kelısıp jatyr-mys. Atyrau mūnai öŋdeu zauytynda jūmys ısteitın derekközdıŋ aituynşa, Ǧalymjan Jusanbaev QMG basqarma töraǧasy Ashat Hasenovpen söilesken. Olar bas direktor auysqannan keiın Jusanbaev pen zauyt arasyndaǧy yqtimal qarym-qatynasty talqylaǧan boluy mümkın. Jūmystan bosatu turaly mäsele älı şeşılgen joq»,—delıngen habarlamada.
QMG baspasöz hatşysy Erlan Sisenov köpşılıktı resmi közderden alynǧan aqparatqa senuge şaqyrdy.
«Atyrau mūnai öŋdeu zauytynyŋ bas direktory Ǧalymjan Jusanbaevtyŋ qyzmetınen ketuı mümkın degen aqparat taraluda. Tek resmi közderden alynǧan aqparatqa senıŋız. Atyrau mūnai öŋdeu zauytynyŋ jūmysyna keletın bolsaq, zauyt qalypty jūmys ıstep tūr»,—dedı ol.
Aita keteiık, Ǧalymjan Jusanbaev 2024 jyldyŋ 10 qaŋtarynda Atyrau mūnai öŋdeu zauytynyŋ bas direktory lauazymyna taǧaiyndalǧan edı. 16 aqpanda zauyttyŋ bas injenerı Ädılet Şoşanbasov jaŋa bas direktordy zauytta qauyrt jaǧdai jasady, balaǧat sözder aitty jäne käsıporyn basşylyǧy tarapynan yqtimal qarjylyq ūrlyq jasady dep aiyptady.
Ǧalymjan Jusanbaev būl mälımdemege pıkır bıldırıp, prezident Qasym-Jomart Toqaevqa eskı klannyŋ bilıkke kedergı keltırıp otyrǧanyn jetkızdı. Būl dau boiynşa «QazMūnaiGaz» tarapynan qūrylǧan komissiia tekseru jūmystaryn jürgızıp, 19 aqpanda Jusanbaev qyzmetınen bosatyldy.
21 mausymda Astana soty Jusanbaevty Atyrau mūnai öŋdeu zauytynyŋ bas direktory qyzmetıne qaitarǧany belgılı boldy.
