اقش سەناتى پرەزيدەنت دونالد ترامپتىڭ يرانعا قارسى اسكەري ءىس-قيمىلدارىن كونگرەسس رۇقساتىنسىز جۇرگىزۋ قۇقىعىن شەكتەۋگە باعىتتالعان رەزوليۋتسيانى قايتا قولدامادى، دەپ حابارلايدى "ادىرنا" ۇلتتىق پورتالى.
قۇجاتتى 47 سەناتور قولداپ، 52-ءسى قارسى داۋىس بەرگەن.
اتالعان باستاما دەموكراتتار تاراپىنان ۇسىنىلعان. ولار اسكەري ارەكەتتەردى كونگرەستىڭ رەسمي كەلىسىمىنسىز جالعاستىرۋعا بولمايتىنىن العا تارتىپ وتىر. اقش كونستيتۋتسياسىنا سايكەس، سوعىس جاريالاۋ قۇقىعى كونگرەسكە تيەسىلى.
الايدا اق ءۇي مەن رەسپۋبليكاشىلدار پرەزيدەنتتىڭ ارەكەتتەرىن زاڭدى دەپ سانايدى. ولاردىڭ پىكىرىنشە، مەملەكەت باسشىسى باس قولباسشى رەتىندە بەلگىلى ءبىر شەكتەۋلى وپەراتسيالاردى كونگرەسس رۇقساتىنسىز جۇرگىزە الادى.
سەناتتاعى پىكىرتالاس بارىسىندا حالىقارالىق قاتىناستار كوميتەتىنىڭ توراعاسى دجيم ريش دەموكراتتاردى سىناپ، ولاردى يراندى قولداپ وتىر دەپ ايىپتادى. ال قارۋلى كۇشتەر كوميتەتىندەگى جەتەكشى دەموكرات دجەك ريد كەرىسىنشە، ارىپتەستەرىن قاقتىعىستى ۋشىقتىرماي، بەيبىت جولدى تاڭداۋعا شاقىردى.
قوعامدىق پىكىر دە ەكىگە بولىنگەن. ساۋالناما دەرەكتەرىنە سايكەس، امەريكالىقتاردىڭ 60%-ى يرانعا قارسى اسكەري ارەكەتتەرگە قارسى. دەگەنمەن، بۇل ماسەلە پارتيالىق ۇستانىمعا بايلانىستى وزگەرەدى: رەسپۋبليكاشىلداردىڭ باسىم بولىگى ترامپتى قولداسا، دەموكراتتاردىڭ از عانا بولىگى كەلىسەدى.
