الەۋمەتتىك جەلىدە «_khassanov» اتىمەن بەلگىلى اتاجۇرت وكىلدەرىنىڭ سوتىنا قاتىستى پىكىر ءبىلدىردى.
Instagram-دا جاريالاعان ۆيدەوسىندا بلوگەر بۇل ارەكەتتەردىڭ ارتىندا ءدال قازىر امەريكادا جۇرگەن سەرىكجان ءبىلاش تۇرعانىن ايتادى.
«بۇل كەڭىنەن تارالىپ جاتقان ۇلكەن ماسەلە. الەۋمەتتىك جەلىلەردەن بارلىقتارىڭىز دا كورگەن بولارسىزدار دەپ ويلايمىن. بۇل ماسەلە 19 قازاعىمىزدىڭ سوتتالۋىنا قاتىستى. نە ءۇشىن ولار سوتتالىپ جاتىر؟ ءبىر ارانداتۋشى، ءىرىڭ سالۋشى سەرىكجان ءبىلاش دەگەن ازامات بار. سونىڭ سوزىنە ەرىپ، بۇل كىسىلەر باسقا ەلدىڭ تۋىن جانە باسشىسىنىڭ سۋرەتىن ورتەگەن»، – دەيدى بلوگەر.
ءسوزىن تارقاتا كەلە بلوگەر سەرىكجان ءبىلاشتى سىنعا الىپ، مۇنداي ارانداتۋشىلاردىڭ وزدەرى ارەكەتكە ەشقاشان بارمايتىنىن، باسىن قاتەرگە مۇلدە تىكپەيتىنىن، تەك ادامداردى ايداپ سالۋمەن جۇرەتىنىن جەتكىزدى.
«قازىر ءوزى امەريكا مەملەكەتىندە ەكەن. قازىر سول ەلدە ءجۇرىپ، نەگە شىقپايدى ءوزى تۋ نەمەسە سۋرەتتى ورتەپ؟! مۇندايلار وزدەرى شىعا المايدى، ولار تەك باسقالاردىڭ ميىن ۋلايدى، بىراق وزدەرى شىقپايدى»، – دەدى ول.
سونداي-اق، ۆيدەودا بلوگەر مۇنداي زاڭعا قايشى ارەكەتتىڭ سالدارىنا دا توقتالدى. ونىڭ ايتۋىنشا، ارانداتۋشىنىڭ سوزىنە ەسسىز ەرىپ، قىلمىس جاساعان قازاقتاردىڭ ارتىندا اتا-اناسى، باۋىرى، كەلىنشەكتەرى مەن بالالارى جىلاپ قالعان.
ءسوز سوڭىندا بلوگەر ءاربىر اقپاراتتى سىني كوزقاراسپەن قابىلداۋعا جانە دە ارانداتۋشىلاردىڭ ارتىنان ەرە بەرمەۋگە شاقىردى.
«مەنىڭ سىزدەرگە ايتارىم، ءدال وسىنداي جاعدايعا ءتۇسىپ قالماۋ ءۇشىن ءبىرىنشى كەزەكتە كىمدى تىڭداپ جاتسىز، كىمدى قولداپ جاتسىز، كىمنىڭ ايتقانىن ىستەپ جاتسىز، سونىڭ بارلىعىن ءبىرىنشى كەزەكتە انىقتاپ ءبىلىپ الىڭىزدار»، – تۇيىندەدى ول.
