بەلگىلى اكتەر، قازاقستاننىڭ حالىق ءارتىسى، تەاتر رەجيسسەرى، پروفەسسور ەسمۇحان وباەۆ 85 جاسقا قاراعان شاعىندا ومىردەن وزدى. قارالى حاباردى مادەنيەت جانە اقپارات مينيسترلىگى جەتكىزدى، دەپ حابارلايدى «ادىرنا» ءتىلشىسى.
«ەسمۇحان نەسىپبايۇلى سانالى عۇمىرىن قازاق تەاتر ونەرىنىڭ دامۋىنا، ساحنا مادەنيەتىنىڭ وركەندەۋىنە، ۇلتتىق رەجيسسۋرا مەن اكتەرلىك مەكتەپتىڭ قالىپتاسۋىنا ارناعان كورنەكتى تۇلعا بولاتىن. ۇلت مادەنيەتىنىڭ مەرەيىن وسىرگەن، تەاتر ونەرىنىڭ ابىرويىن اسقاقتاتقان ارداقتى ازامات قاي كەزەڭدە دە ونەرگە ادالدىقتىڭ، كاسىبىنە جاۋاپكەرشىلىكتىڭ ۇلگىسىن كورسەتە ءبىلدى. ول تاربيەلەگەن بۋىن، ساحنالاعان تۋىندىلار مەن قالىپتاستىرعان كوركەمدىك ۇستانىم قازاق تەاترىنىڭ التىن قورىندا قالا بەرمەك. ۇلتتىق مادەنيەتتىڭ دامۋىنا سۇبەلى ۇلەس قوسقان ەسمۇحان نەسىپبايۇلىنىڭ جارقىن بەينەسى، شىعارماشىلىق مۇراسى مەن عيبراتتى عۇمىر جولى حالقىمىزدىڭ جادىندا ماڭگى ساقتالادى دەپ سەنەمىز. مارقۇمنىڭ جانى ءجانناتتا، يمانى سالامات، توپىراعى تورقا بولسىن!»–دەلىنگەن حابارلامادا.
ايتا كەتەيىك، ەسمۇحان وباەۆ – پلاتينالى «تارلان» تاۋەلسىز سىيلىعىنىڭ، «پاراسات» جانە «بارىس» وردەندەرىنىڭ يەگەرى، مەملەكەتتىك ستيپەنديانىڭ لاۋرەاتى. ول ءار جىلدارى م. اۋەزوۆ اتىنداعى قازاق مەملەكەتتىك دراما تەاترىنىڭ قويۋشى-رەجيسسەرى، ع.مۇسىرەپوۆ اتىنداعى بالالار مەن جاسوسپىرىمدەر تەاترىنىڭ رەجيسسەرى، سەمەيدەگى اباي اتىنداعى قازاق دراما تەاترىنىڭ كوركەمدىك جەتەكشىسى جانە باس قويۋشى-رەجيسسەرى قىزمەتتەرىن اتقارعان ەدى.
