ىستامبۇل پروكۋراتۋراسى جەمقورلىق پەن لاڭكەستىك ۇيىمدارمەن بايلانىس ءىسى بويىنشا 61 ادامنىڭ قاماۋعا الىنۋىن تالاپ ەتتى، دەپ حابارلايدى "ادىرنا" ۇلتتىق پورتالى.
تۇركيالىق Halk TV ارناسىنىڭ مالىمەتىنشە، 23 ناۋرىز كۇنى استانا ۋاقىتىمەن 07:35-تە سوت يماموگلۋدى تەرگەۋدى باستاعان. سوت وتىرىسىنا يماموگلۋدىڭ جۇبايى، ۇلى جانە تۇركياداعى نەگىزگى وپپوزيتسيالىق كۇش – حالىق-رەسپۋبليكالىق پارتياسىنىڭ جەتەكشىسى وزگۇر وزەل دە قاتىستى.
بۇعان دەيىن ول وزىنە تاعىلعان بارلىق ايىپتاردى جوققا شىعارعان بولاتىن. پروكۋراتۋرا ونىڭ قاماۋعا الىنۋىن تالاپ ەتتى.
ىستامبۇلدىڭ قىلمىستىق سوتى پروكۋراتۋرانىڭ ەكرەم يماموگلۋنى تەرگەۋ اياقتالعانعا دەيىن قاماۋدا ۇستاۋ تۋرالى ءوتىنىشىن قاناعاتتاندىردى. ونى قاماۋعا الۋ شەشىمىن قابىلدادى. ول جاقىن ارادا تۇرمەگە جەتكىزىلەدى.
يماموگلۋعا ەكى ءىس بويىنشا ايىپ تاعىلعان. ءبىرىنشىسى – مەرياداعى جەمقورلىققا، ەكىنشىسى – تەرروريزمدى قارجىلاندىرۋعا قاتىستى. دەگەنمەن، قازىرگى تاڭدا ول جەمقورلىق ءىسى بويىنشا قاماۋعا الىنعان.
ونىمەن بىرگە بىرقاتار جوعارى لاۋازىمدى شەنەۋنىكتەر، ونىڭ ىشىندە مەردىڭ كەڭەسشىسى مۇرات ونگۋن جانە ستامبۇلدىڭ شيشلي اۋدانىنىڭ باسشىسى ەمراح شاحان دا قاماۋعا الىندى. ال كەيبىر كۇدىكتىلەر سوت باقىلاۋىمەن نەمەسە ەلدەن كەتپەۋ تۋرالى قولحاتپەن بوساتىلدى.
جالپى العاندا، جەمقورلىق جانە تەرروريزم ىستەرى بويىنشا 92 ادام تەرگەلۋدە.
