مەملەكەت باسشىسى قاسىم-جومارت توقاەۆ تۇركى مەملەكەتتەرى ۇيىمىنىڭ 10-شى سامميتىندەگى كىرىسپە ءسوزىن تۇركيانى قۇتتىقتاۋدان باستادى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
«تۇركى حالىقتارىنىڭ قاسيەتتى قارا شاڭىراعى – قازاقستانعا قوش كەلدىڭىزدەر! ەڭ الدىمەن، باۋىرىم رەدجەپ تايپ ەردوعان مىرزاعا جانە بارشا تۇرىك اعايىندارعا تۇركيانىڭ 100 جىلدىق مەرەيتويى قۇتتى بولسىن دەگىم كەلەدى. انادولىنىڭ عاسىرلىق شەجىرەسى بيىك بەلەسكە، زور جەتىستىككە تولى. ۇلى تۇلعالارىنىڭ ارقاسىندا بۇگىندە تۇركيا بۇكىل الەمگە ىقپالى بار قۋاتتى مەملەكەتكە اينالدى.
سونداي-اق قادىرلى يلحام گەيداروعلى اليەۆ مىرزانى جانە ازەربايجان حالقىن ەل ىرگەسىن بەكەمدەۋىمەن قۇتتىقتايمىن! ءسىزدىڭ ەلىڭىز اۋماقتىق تۇتاستىعىن قالپىنا كەلتىرىپ، دامۋدىڭ جاڭا تاريحي داۋىرىنە قادام باستى. وسى تاريحي قادام بىرىككەن ۇلتتار ۇيىمىنىڭ جارعىسىنا جانە قاۋىپسىزدىك كەڭەسىنىڭ قارارىنا سايكەس جۇزەگە استى.
سونىمەن قاتار، ۇيىمنىڭ قازىرگى توراعاسى وزبەكستان پرەزيدەنتى، قۇرمەتتى شاۆكات ميرومونوۆيچ ميرزيوەۆكە تۇركى ەلدەرىنىڭ ىنتىماقتاستىعىن نىعايتۋعا زور ۇلەس قوسقانى ءۇشىن ەرەكشە العىسىمدى ايتامىن»،—دەدى پرەزيدەنت.
قاسىم-جومارت كەمەلۇلى باۋىرلاستىققا نەگىزدەلگەن بىرلىكتى ساقتاۋ كەرەكتىگىن اتاپ ءوتتى.
«ءبىز بابالار وسيەتىن ورىنداپ، تۇركى ەلدەرىنىڭ ىنتىماعىن نىعايتىپ كەلەمىز. ەندىگى ماقسات – ءوزارا سەنىمگە جانە باۋىرلاستىققا نەگىزدەلگەن بىرلىگىمىزدى ساقتاپ، وسكەلەڭ ۇرپاققا تابىستاۋ.
تۇركى الەمى جاھاندىق ىقپالى بار ەلدەرمەن تەڭ دارەجەدە قارىم-قاتىناس جاساپ وتىر. باسقا مەملەكەتتەر ءبىزدىڭ ۇيىمنىڭ ۇستانىمدارىنا باسا ءمان بەرەتىن بولدى. سوندىقتان، تۇركى حالىقتارىنىڭ ىقپالداستىعىن ارتتىرا ءتۇسۋ – بارىمىزگە ورتاق مىندەت»،—دەدى ول.
ايتا كەتەيىك، تۇركى مەملەكەتتەرى ۇيىمى ءسامميتى استانادا ءوتىپ جاتىر.
