Túrkııa azamaty qazaq tilin úırený úshin Qazaqstanǵa arnaıy kóship keldi, dep habarlaıdy "Adyrna" ulttyq portaly Tengri.news-ke siltep.
Kadrıe Ishykly – Túrkııa azamaty, Ystambul qalasynyń turǵyny, úsh balanyń anasy. Qazirgi ýaqytta ol Túrkistandaǵy Q.A. Iasaýı atyndaǵy ýnıversıtettiń Daıyndyq ortalyǵynyń tyńdaýshysy. Kadrıe hanym ýnıversıtet tarıhyndaǵy eń úlken jastaǵy stýdent bolyp, jastarǵa úlgi.
Kadrıe Ishyklynyń aıtýynsha, túrki halyqtarynyń elderi, mádenıeti jáne dástúrlerine degen qyzyǵýshylyǵy ony Túrkistanǵa bilim alýǵa jetelegen. Qazaqstanǵa kelgenine nebári bir jarym aı bolsa da, ol qazirdiń ózinde qazaq tilin túsiný deńgeıine jetken.
«Qazir qazaq tilin úırenip jatyrmyn. Túrki elderiniń mádenıetimen tanysqan unaıdy. Munda qazaq tilin meńgerip, mádenıetin tanyp, keıin baýyrlas elderdi aralaǵym keledi», – deıdi ol.
Buǵan deıin Kadrıe Ishykly Túrkııada «týrızm» mamandyǵy boıynsha joǵary bilim alǵan jáne álemniń 20-ǵa jýyq elin aralaǵan. Endigi maqsaty – Ortalyq Azııany zertteý. Osyǵan oraı, Ahmet Iasaýı ýnıversıtetinde «týrızm» mamandyǵy boıynsha oqýyn jalǵastyrýdy josparlap otyr.
Qazaqstanǵa kelgen boıda Kadrıe Ishykly jańa ortaǵa tez beıimdelip, barlyǵymen ońaı til tabysqan. Daıyndyq ortalyǵynyń oqytýshylary onyń bilimge degen ashyqtyǵy men qazaq tiline joǵary qyzyǵýshylyǵyn erekshe atap ótýde.
Kadrıe Ishyklynyń batyl sheshimi jastardy shabyttandyryp, bilim alýǵa eshqashan kesh emes ekenin dáleldedi.
