رەسەي پرەزيدەنتى ءپۋتيننىڭ استاناعا ساپارى كەزىندە اۋەجاي مەن جينالىس زالىنداعى اسپان تۇستەس كىلەم مەن كىلەم شەتىندەگى ويۋ-ورنەكتەر ماعان قازاقتىڭ قاسيەتتى تۋىن ەسكە ءتۇسىردى.
تۋ ءار مەملەكەت ءۇشىن كيەلى. ونى اياعىمىزدىڭ استىنا ەمەس، باسىمىزدىڭ ۇستىندە كوتەرىپ الىپ ءجۇرۋىمىز كەرەك.
ارينە، بۇل كىلەمنىڭ ءتۇسى مەن ورنەكتى جاساعان ديزاينىرلار تۋعا ۇقساس بولسىن دەپ ويلاماعان شىعار. ولار مۇمكىن شەتتەن كەلگەن قادىرلى مەيمانداردى قازاقتىڭ ۇلتتىق بوياۋى جانە ناقىشىمەن قارسى العانىمىز دۇرىس دەگەن شىعار.
الايدا ول سىرت كوزگە قازاقتىڭ جالاۋى رەتىندە كورىنۋى مۇمكىن. وندا قادىرلى مەيماندار، “قازاق دەگەن قالاي حالىق؟ ولاردىڭ ۇعىمىندا قۇرمەتتەۋ مۇمكىن وسىلاي بولاتىن شىعار دەپ” قاتە ويلاۋى مۇمكىن.
مۇنداي جاڭساق ويلارعا سەبەپ بولۋدان اۋلاق بولۋ كەرەك شىعار. حالىقارالىق ستاندارت بويىنشا، كوپ ەلدەردە مۇنداي سالتاناتتى ورىندارداعى كىلەمدەر قىزىل ءتۇستى بولادى.
ءبىز دە مۇنى حالىقارالىق ۇردىسكە ساي جاساساق، نەمەسە كوك ءتۇستى كىلەم قولدانعاننىڭ وزىندە تۋعا ۇقساپ كەتپەس ءۇشىن شەتىندەگى ويۋ-ورنەكتەردى الىپ تاستاساق، ءسويتىپ كيەلى تۋىمىزدىڭ نىشاندارى اياق استىنداعى كىلەمگە كەستەلەنگەن دەگەن تۇسىنىكتەن ارىلار ەدىك.
وسىلايشا ۇلتتىق تۋدىڭ بەدەلىنە نۇقسان كەلتىرەتىن وقىس وقيعالاردىڭ الدىن العان بولار ەدىك.
ابدىۋاقاپ قارا
