جاڭا ويىنشىقتار الەۋمەتتىك جەلىلەردە ءجيى اتالىپ، بالالار اراسىندا عانا ەمەس، ەرەسەكتەر اراسىندا دا تەز تانىمال بولدى. الايدا ەل اراسىندا ءتۇرلى ءتۇستى ويىنشىق تۋرالى سان ءتۇرلى پىكىر قالىپتاسۋدا. پوپ-يت جانە سيمپل-ديمپل لگبت-نى ناسيحاتتاي ما؟
بيىلعى جىلعى ترەندتەردىڭ ءبىرى - بۇل جاڭا سترەسكە قارسى ويىنشىقتار: پوپ-يت، سيمپل-ديمپل جانە سكۆيش. ولاردىڭ بارلىعى ءبىر ۋاقىتتا ۆيرۋس ءتارىزدى جىلدام تانىمال بولدى. ال الەۋمەتتىك جەلىلەردە جاڭا ترەندتەردى قالاي قولدانۋعا بولاتىندىعى تۋرالى مەمدەر پايدا بولدى.
وزگە ويىنشىقتاردىڭ داۋرەنى توقتاعانىنا قاراماستان، انتيسترەسستى ويىنشىقتاردىڭ تاريحى بەسەنەدەن بەلگىلى. ياعني، انتيسترەسستى ويىنشىقتار بۇرىن دا بولدى. بىرنەشە جىل بۇرىن تانىمال بولعان سپيننەرلەردى ەسكە الىڭىز. ولار - سترەسستەن ارىلۋعا، الاڭداۋشىلىقتان قۇتىلىپ، جانىڭىزدى تىنىشتاندىرۋعا كومەكتەسەدى. نەگە؟ ءبىز بۇل سۇراققا پسيحولوگيالىق تۇرعىدان جاۋاپ بەرەلىك.
پوپ-يت جانە سيمپل-ديمپل دەگەنىمىز نە؟
ويىنشىقتىڭ اتاۋى اعىلشىن تىلىنەن اۋدارعاندا «pop it» - «جار» (شاردى جار دەگەن سەكىلدى) دەپ اۋدارىلادى. ءىس جۇزىندە، ول جارىلعىش قاعازى سياقتى جۇمىس ىستەيدى، تەك ءسىز ونى قالاعانىڭىزشا «جارىپ» شىعارا الاسىز. باسقان كەزدە ويىنشىقتىڭ جارتى شارلارى باسقا جاققا قاراي ءيىلىپ، وزىنە ءتان دىبىس شىعارادى، سودان كەيىن ونى اۋدارىپ، ويىندى جالعاستىرۋعا بولادى. پوپ-ءيتتى ەندى «كلاسسيكالىق» كەمپىرقوساق، شەڭبەر سىندى، ءتۇرلى-ءتۇستى گۇلدەرگە، جۇرەكتەرگە جانە ءتىپتى جانۋارلارعا دەيىن ءار ءتۇرلى تۇستەردە، پىشىندەر مەن ولشەمدەردە تابۋعا بولادى.
سيمپل- ديمپل ءدال پوپ-يت سياقتى جۇمىس ىستەيدى. بىراق ول ادەتتە، كىشىگىرىم مولشەردە جانە باسقىش شارلاردىڭ سانىمەن ەرەكشەلەنەدى.
نەلىكتەن انتيسترەسس ويىنشىقتار تىنىشتاندىرۋعا كومەكتەسەدى؟
ادام بالاسى بىرنارسەگە الاڭداعاندا، بويىندا قورقىنىش سەزىمى ۇيالاپ، ءوزىن قويارعا جەر تاپپاي، تىپىرشىپ، مازاسىزدانا باستايدى. ءدال سونداي مەزەتتە پسيحولوگيالىق تۇرعىدان الار بولساق، ادام ءوز دەنەسىنە قاتىستى ارەكەتتەر جاساي باستايدى. ماسەلەن ارى-بەرى ءجۇرىپ، ساۋساقتارىن قىتىرلاتۋى مۇمكىن. وسى جاعدايدا انتيسترەسستى ويىنشىقتار ادامنىڭ قولى ارقىلى بار سترەسستى، ۋايىمدى شىعارۋعا كومەكتەسەدى.
جالپى العاندا، سترەسسكە قارسى ويىنشىقتار مازاسىزدىققا كومەكتەسەدى، سوندىقتان ولاردى قولدا ۇستاۋ ماڭىزدى. مىسالى، وزدەرىڭىزبەن گۇلشەتەن، قيىرشىق تاس نەمەسە ۇقساس زاتتاردى الىڭىز. ەگەر جوعارى قورقىنىش نەمەسە مازاسىزدىق بولسا، پسيحولوگ ءبىر نارسەنى شايناۋدى نەمەسە قولىڭىزبەن ويناۋدى ۇسىنادى. وسىلايشا ءسىز ءوز دەنەڭىزدى باسقارا الاتىندىعىڭىزدى سەزىنەسىز.
ءار ءتۇرلى انتيسترەسستىك ويىنشىقتار سترەسسقا قالاي اسەر ەتەدى؟
سترەسسكە قارسى ويىنشىقتاردىڭ كوپتەگەن تۇرلەرى بار، پوپ-يت سوڭعى شىققان ويىنداردىڭ ءبىرى. ولاردىڭ كەيبىرەۋلەرى پسيحوتەراپيانىڭ ارنايى تۇرلەرىندە دە قولدانىلادى. مىسالى، كينەستەتيكالىق قۇم پسيحوەموتسيونالدى فوندى تەگىستەۋگە كومەكتەسەدى، الاڭداۋشىلىقتىڭ جالپى دەڭگەيىن تومەندەتەدى، ۇساق موتوريكانى، زەيىندى شوعىرلاندىرۋدى دامىتادى، ەستەن شىققان دۇنيەنى قايتا ەسكە تۇسىرۋگە كومەكتەسەدى.
پوپ-يتتەر جاعدايىندا ءتۇس تەراپياسى دا قوسىلعان. اشىق تۇستەر ادامنىڭ پسيحوەموتسيونالدى جاعدايىنا دا اسەر ەتەدى. بالا نەمەسە ەرەسەك ادام تاڭدايتىن رەڭكتەرگە بايلانىستى.
بۇل ويىنشاقتار وزگە وريەنتاتسيالى ادامداردى ناسيحاتتاي ما؟
وسىعان قاتىستى تاتارستان ەلىندە پوپ-يت ويىنشىعىن تەكسەرۋدى تالاپ ەتكەن ازامات سارسەمباەۆ:
«مەن بۇل ويىنشىقتى ءبىر جارىم جىل بۇرىن كوردىم. باسىندا مەن وعان ءمان بەرمەدىم، سودان كەيىن ويلادىم: ونى لگبت جالاۋىمەن سالىستىرىپ كورەيىنشى دەپ. ولار بىردەي، اينىمايدى»، - دەدى.
سونىمەن قاتار، ول پوپ-ءيتتىڭ سترەسستى جەڭىلدەتەتىنىنە سەنبەيدى. «جاقسى، ساۋساقتارىڭىزبەن باساسىز، سوندا نە؟ سترەسستەن ارىلدىق پا؟ جوق، بۇل قاتە نارسە»، - دەدى سارسەمباەۆ. ول پوپ-ءيتتى ساتۋعا تىيىم سالۋ كەرەك دەيدى.
ءبىزدىڭ ەلىمىزدە دە بۇل ويىنشىققا قارسى شىققان جاندار بارشىلىق. بلوگەر مەرەي جولشى ءوزىنىڭ ينستا پاراقشاسىندا بۇل ويىنشىق لگبت-نى ناسيحاتتايدى دەپ قارسى ويىن ءبىلدىرىپ بىرنەشە ويىنشىقتى ورتەپ جىبەردى. جەلىدە بۇل ۆيدەو قىزۋ تالقىعا تۇسكەن بولاتىن.
پىكىرلەر ەكىگە ءبولىندى: "مەرەي، بۇل ويىنشىقتىڭ لگبت-عا قاتىسى نە؟", "ميعا سىيمايتىن دۇنيە", "دۇرىس، توقتاتۋ كەرەك" دەيدى حالىق.
"ادىرنا" ۇلتتىق پورتالى
