قازاقستان 2025 جىلى ەكونوميكا مەن الەۋمەتتىك سالادا اۋقىمدى ناتيجەلەرگە قول جەتكىزدى. ەل اۋماعىندا جۇزدەگەن جاڭا ءوندىرىس ورىندارى ىسكە قوسىلىپ، تۇرعىن ءۇي قۇرىلىسى قارقىن الدى. سونىمەن قاتار جاڭا مەكتەپتەر مەن اۋرۋحانالار پايدالانۋعا بەرىلدى. بۇل تۋرالى پرەزيدەنتتىڭ كومەكشىسى رۋسلان جەلدىباي مالىمدەدى، دەپ حابارلايدى "ادىرنا" ءتىلشىسى.
مەملەكەت باسشىسى قاسىم-جومارت توقاەۆ جىل بويى جۇمىس ساپارلارىمەن ەلىمىزدىڭ 9 وڭىرىنە بارىپ، 50-دەن استام وندىرىستىك، عىلىمي جانە الەۋمەتتىك-مادەني نىسانداردىڭ قىزمەتىمەن تانىستى.
الدىن الا بولجام بويىنشا، 2025 جىلدىڭ قورىتىندىسىندا قازاقستان ەكونوميكاسىنىڭ ءوسىمى 6 پايىزدان اسادى. بۇل – سوڭعى ون جىلداعى ەڭ جوعارى كورسەتكىش. سونداي-اق ەل تاريحىندا العاش رەت جالپى ىشكى ءونىم كولەمى 300 ملرد اقش دوللارىنان اسىپ، جان باسىنا شاققانداعى ءجىو 15 مىڭ اقش دوللارىنا جەتەدى دەپ كۇتىلۋدە.
جىل ىشىندە پرەزيدەنت حالىقارالىق دەڭگەيدە دە بەلسەندى جۇمىس جۇرگىزدى. قاسىم-جومارت توقاەۆ 23 مەملەكەتكە رەسمي ساپار جاساپ، رەسەي مەن وزبەكستاندا ەكى رەتتەن بولدى. سونداي-اق قىتاي، تۇركيا، جاپونيا، يوردانيا، قىرعىزستان، اقش، تۇرىكمەنستان، بىرىككەن اراب امىرلىكتەرى، ازەربايجان جانە تاجىكستان ەلدەرىنە باردى.
