وزبەكستان پرەزيدەنتى شاۆكات ميرزيوەۆ جاڭادان سايلانعان ولي ماجليس وتىرىسىندا ەلدىڭ 2025 جىلعا دەيىنگى نەگىزگى ەكونوميكالىق ماقساتتارىن تانىستىردى، دەپ حابارلايدى "ادىرنا " ۇلتتىق پورتالى.
پرەزيدەنت ءوز ماقساتتارىن تانىستىردى. وندا ەكونوميكالىق ءوسىمدى 6-7% دەڭگەيىندە قامتاماسىز ەتۋ، ينفلياتسيانى 5-6%، ال بيۋدجەت تاپشىلىعىن 3%-دان اسپايتىن شەكتە ۇستاۋ مەن 1 ميلليون ادامدى كەدەيلىكتەن شىعارۋ. سونداي-اق، 300-دەن استام ءىرى ينۆەستيتسيالىق جوبانى جۇزەگە اسىرۋ، ازىق-تۇلىك قاۋىپسىزدىگىن ارتتىرىپ، اۋىل شارۋاشىلىعى ءونىمىن 1,3 ەسە كوبەيتۋ، ەكونوميكاداعى جەكە سەكتوردىڭ ۇلەسىن 85%-عا دەيىن ۇلعايتۋ. بۇل ءۇشىن مەملەكەتتىك اكتيۆتەردى كەڭ كولەمدە جەكەشەلەندىرۋ جوسپارلانعان.
اتاپ ايتقاندا، مەملەكەتكە تيەسىلى 2000 كاسىپورىندى جەكەشەلەندىرۋ مەن 5000-نان استام جىلجىمايتىن مۇلىك نىسانىن ساتۋ، ءىرى 16 كاسىپورىننىڭ اكتسيالارىن IPO ارقىلى ورنالاستىرۋ، مەملەكەتتىك-جەكەمەنشىك سەرىكتەستىك اياسىندا جالپى سوماسى 30 ملرد دوللاردى قۇرايتىن جوبالاردى جۇزەگە اسىرۋ.
پرەزيدەنت ماقساتتارعا جەتۋ ءۇشىن ۇكىمەت پەن پارلامەنتتىڭ تىعىز ىنتىماقتاستىعى قاجەت ەكەنىن اتاپ ءوتتى. سونداي-اق حالىقارالىق سەرىكتەستىكتى دامىتۋعا، ەلدىڭ قورعانىس قابىلەتىن نىعايتۋعا جانە جاستار تاربيەسىنە ەرەكشە نازار اۋدارىلاتىنىن ايتتى.
شاۆكات ميرزيوەۆ سوڭعى بەس جىلدا قول جەتكىزىلگەن ەكونوميكالىق ناتيجەلەردى دە اتاپ ءوتتى.
وزبەكستان ەكونوميكاسى ەكى ەسە ءوسىپ، كولەمى 100 ملرد دوللاردان اسقان، جان باسىنا شاققانداعى تابىس 3000 دوللارعا جەتتى. سوڭعى بەس جىلدا ەكسپورت كولەمى ەكى ەسە ءوسىپ، 25 ملرد دوللارعا جەتكەن. التىن-ۆاليۋتا رەزەرۆتەرى 40 ملرد دوللاردان اسسا، شەتەلدىك ينۆەستيتسيالار كولەمى التى ەسە كوبەيىپ، 1,5 ميلليون جۇمىس ورنى اشىلعان. 10 ءىرى كۇن جانە جەل ەلەكتر ستانتسياسى ىسكە قوسىلدى. بالاما ەنەرگيا ۇلەسى ءۇش ەسە ارتىپ، مەكتەپكە دەيىنگى بىلىممەن قامتۋ كورسەتكىشى 74%-عا، جوعارى بىلىممەن قامتۋ 39%-عا جەتتى. بارلىق ايماقتا «ينسون» (ادام) ورتالىقتارى اشىلىپ، تۇرعىندارعا 100-دەن استام الەۋمەتتىك قىزمەت كورسەتىلۋدە.
ميرزيوەۆتىڭ ايتۋىنشا، "وزبەكستان-2030" ستراتەگياسى اياسىندا ەلدىڭ ءجىو كولەمىن 160 ملرد دوللارعا جەتكىزۋ كوزدەلىپ وتىر. بيىلعى جىلى بۇل كورسەتكىش 110 ملرد دوللار بولادى دەپ بولجانۋدا.
سونداي-اق، پارلامەنت وتىرىسىندا دەپۋتاتتار ابدۋللا اريپوۆتى قايتادان پرەمەر-مينيستر لاۋازىمىنا بەكىتتى. ال 2025 جىل وزبەكستاندا «قورشاعان ورتانى قورعاۋ جانە جاسىل ەكونوميكا جىلى» دەپ جاريالاندى.
