وزبەكستان پرەزيدەنتى شاۆكات ميرزيوەۆ ورازا ايت قارساڭىندا 488 سوتتالۋشىعا راقىمشىلىق جاساۋ تۋرالى جارلىققا قول قويدى، دەپ حابارلايدى “ادىرنا” ۇلتتىق پورتالى فەرعاناعا سىلتەپ.
بۇل تۋرالى ەلدىڭ كونستيتۋتسياسىنىڭ 109-بابى 23-تارماعىنا سايكەس جاريالاندى.
جارلىققا سايكەس، 100 ادام جازادان تولىق بوساتىلسا، 268 ادام شارتتى تۇردە مەرزىمىنەن بۇرىن بوستاندىققا شىقتى. 34 سوتتالۋشىنىڭ جازاسى جەڭىل تۇرىنە اۋىستىرىلدى. 86 ادامنىڭ باس بوستاندىعىنان ايىرۋ مەرزىمى قىسقارتىلدى.
راقىمشىلىققا ىلىككەندەردىڭ وتباسىلارىنا ورالۋى، الەۋمەتتىك بەيىمدەلۋى جانە جۇمىسپەن قامتىلۋى ءۇشىن ءتيىستى مەملەكەتتىك ورگاندارعا تاپسىرما بەرىلدى.
ايتا كەتەيىك، وزبەكستاندا راقىمشىلىق تۋرالى جارلىقتار جىلىنا ءۇش رەت – ورازا ايت، 1 قىركۇيەك – تاۋەلسىزدىك كۇنى جانە 8 جەلتوقسان – كونستيتۋتسيا كۇنى قارساڭىندا قابىلدانادى. بىلتىر بۇل شارا اياسىندا 1431 ادامعا كەشىرىم جاسالعان ەدى.
