شاۆكات ميرزيوەۆ يراننىڭ رۋحاني كوشباسشىسى ءالي حامەنەي قايتىس بولۋىنا بايلانىستى يران پرەزيدەنتى ماسۋد پەزەشكيان اتىنا كوڭىل ايتۋ جەدەلحاتىن جولدادى، دەپ حابارلايدى "ادىرنا" ۇلتتىق پورتالى.
وزبەكستان باسشىسى جولداعان حات ءماتىنىن 2 ناۋرىز كۇنى يراننىڭ تاشكەنتتەگى ەلشىلىگى جاريالادى.
جەدەلحاتتا:
«يراننىڭ جوعارعى رۋحاني كوشباسشىسى، اياتوللا سايد الي حامەنەي مەن ونىڭ وتباسى مۇشەلەرىنىڭ قايتىس بولعانى تۋرالى قارالى حابار ءبىزدى قاتتى قايعىرتتى. ول ءوزىنىڭ ۇزاق جىلدارعى جەمىستى قىزمەتىندە يران مەملەكەتتىلىگىن نىعايتۋعا، قوعام تۇراقتىلىعىن قامتاماسىز ەتۋگە جانە ۇلتتىق قۇندىلىقتاردى ساقتاۋعا زور ۇلەس قوستى»، – دەلىنگەن.
سونداي-اق حاتتا حامەنەي يران مەن وزبەكستان اراسىنداعى جان-جاقتى ىنتىماقتاستىق پەن ۇزاق مەرزىمدى سەرىكتەستىكتى دامىتۋعا ەلەۋلى ۇلەس قوسقانى اتاپ ءوتىلدى.
وزبەكستان پرەزيدەنتى يران باسشىلىعى مەن حالقىنا وسى اۋىر كەزەڭدە شىنايى كوڭىل ايتىپ، قايعىعا ورتاق ەكەنىن جەتكىزدى.
ايتا كەتەيىك، ءالي حامەنەي 28 اقپان كۇنى اقش پەن ءيزرايلدىڭ سوققىلارى سالدارىنان قازا تاپقان.
