وزبەكستاندا جالپى قۇنى 7 ملرد دوللار بولاتىن 47 نىساننىڭ قۇرىلىسى باستالدى، دەپ حابارلايدى “ادىرنا”.
بۇل تۋرالى وزبەكستان پرەزيدەنتىنىڭ ءباسپاسوز قىزمەتى حابارلادى.
جوبالار شاۆكات ميرزيوەۆتىڭ قاراقالپاقستان وڭىرىنە ساپارى بارىسىندا ىسكە قوسىلدى. نىساندار ەنەرگەتيكا، ونەركاسىپ، كولىك، مەديتسينا، تسيفرلىق ەكونوميكا جانە قىزمەت كورسەتۋ سالالارىن قامتيدى.
قاراقالپاقستاننىڭ ءبىر اۋدانىندا ساۋد ارابياسىمەن بىرلەسىپ قۋاتى 1,5 گۆت بولاتىن جەل ەلەكتر ستانتسياسىنىڭ قۇرىلىسى باستالدى. ال قىتايلىق سەرىكتەستەرمەن تسيفرلىق ۆاليۋتا ءوندىرۋ جانە جاساندى ينتەللەكتكە ارنالعان دەرەكتەردى وڭدەۋ ورتالىقتارىن قۇرۋ جوبالارى جۇزەگە اسىرىلىپ جاتىر. ولاردىڭ جالپى قۇنى شامامەن 2,3 ملرد دوللاردى قۇرايدى.
سونىمەن قاتار كەن ورىندارىنىڭ بىرىندە قۇنى 20 ملن دوللار بولاتىن التىن ءوندىرۋ كاسىپورنى سالىنادى.
پرەزيدەنت ساپارى بارىسىندا جالپى قۇنى 592 ملن دوللار بولاتىن 11 جاڭا نىساندى دا ىسكە قوستى. ولاردىڭ قاتارىندا جالپى قۋاتى 300 مۆت بولاتىن ەكى جەل ەلەكتر ستانتسياسى، قۋاتى 100 مۆت ەنەرگيا ساقتاۋ جۇيەسى جانە ساۋد ارابياسىمەن بىرلەسىپ سالىنعان، قۇنى 27 ملن دوللار بولاتىن 100 ورىندىق اۋرۋحانا بار.
