وزبەكستان پرەزيدەنتى شاۆكات ميرزيوەۆ 2026 جىلدى «ماحاللالاردى دامىتۋ جانە قوعامنىڭ وركەندەۋ جىلى» دەپ جاريالاۋدى ۇسىندى. بۇل باستاما 26 جەلتوقساندا مەملەكەت باسشىسىنىڭ ولي ماجىلىسكە جانە حالىققا جاساعان جولداۋىندا ايتىلدى، دەپ حابارلايدى “ادىرنا” ۇلتتىق پورتالى.
پرەزيدەنت ءوز سوزىندە ماحاللانى قوعامنىڭ باستى الەۋمەتتىك تىرەگى رەتىندە اتاپ ءوتتى. ونىڭ ايتۋىنشا، ەل تاريحىنداعى قيىن كەزەڭدەردە حالىقتىڭ بىرلىگى مەن ءوزارا قولداۋى ءدال وسى ماحاللا دەڭگەيىندە كورىنىس تاپقان.
«ەگەر ماحاللا تىنىش ءارى تاتۋ بولسا، قوعام دا تۇراقتى بولادى. ال ماحاللا دامىسا، بۇكىل ەل وركەندەيدى»، — دەدى شاۆكات ميرزيوەۆ.
2026 جىل بارلىق نەگىزگى سالالاردا تۇبەگەيلى وزگەرىستەر كەزەڭى بولماق. اتاپ ايتقاندا، مەملەكەتتىك باسقارۋ، سوت-قۇقىق جۇيەسى، ەكونوميكا، ءبىلىم بەرۋ، عىلىم، مەديتسينا، مادەنيەت، سپورت جانە ەكولوگيا سالالارىن كەشەندى دامىتۋ كوزدەلىپ وتىر. وسى ماقساتتا ارنايى مەملەكەتتىك جوسپار قابىلدانادى.
اۋماقتاردى دامىتۋدا كەشەندى ءتاسىل ەنگىزىلەدى. ءار وڭىردە ەكى-ءۇش اۋدان تاڭدالىپ، وندا ينفراقۇرىلىم ماسەلەلەرى ءبىر مەزگىلدە شەشىلىپ، كاسىپكەرلىككە قولايلى جاعداي جاسالادى. بۇل جۇمىستارعا 8,5 ترلن سۋم كولەمىندە قارجى بولىنەدى. سونىمەن قاتار دەپۋتاتتارعا ءوز ايماقتارىندا وزەكتى ماسەلەلەردى شەشۋ ءۇشىن 500 ملرد سۋم قاراستىرىلعان.
جەرگىلىكتى بيۋدجەتتەردىڭ قارجىلىق دەربەستىگىن ارتتىرۋ دا ماڭىزدى باعىتتاردىڭ ءبىرى بولماق. 2026 جىلدان باستاپ قوسىلعان قۇن سالىعىنىڭ ءبىر بولىگى وڭىرلەردە قالدىرىلادى: تاشكەنتتە — 5%، باسقا ايماقتاردا — 20%. ونىڭ جارتىسى تىكەلەي اۋدان بيۋدجەتتەرىنە باعىتتالادى. بۇل ماحاللالاردىڭ ينفراقۇرىلىمىن جاقسارتۋعا قوسىمشا رەسۋرستار تارتۋعا مۇمكىندىك بەرەدى.
العاش رەت وڭىرلەرگە ينفراقۇرىلىمدى دامىتۋ ءۇشىن 20 ترلن سۋم بولىنەدى. الايدا بۇل قاراجات تەك جۇمىس ورىندارىن قۇرىپ، حالىقتىڭ تابىسىن ارتتىراتىن ناقتى جوبالارعا عانا ينۆەستيتسيالاناتىن بولادى.
ۋربانيزاتسيا سالاسىندا 45 اگلومەراتسيالىق اۋماق انىقتالىپ، «تۇراقتى قالا» پلاتفورماسى ىسكە قوسىلادى. ول قالالاردىڭ دامۋ ساپاسىن باعالاۋعا جانە ءار ماحاللانىڭ ماسەلەسىن انىقتاۋعا مۇمكىندىك بەرەتىن ء«ومىر سۇرۋگە قولايلىلىق يندەكسىنە» نەگىزدەلەدى.
ەكونوميكالىق رەفورمالار اياسىندا نەگىزگى سالىق مولشەرلەمەلەرى وزگەرىسسىز قالادى. شاعىن جانە ورتا بيزنەستى قولداۋ ءۇشىن 140 ترلن سۋم ءبولىنىپ، ونىڭ ەداۋىر بولىگى ايەلدەر مەن جاستار كاسىپكەرلىگىن دامىتۋعا باعىتتالادى. «ماحاللادا ونەركاسىپ پەن قىزمەت كورسەتۋ» جوباسى ارقىلى مىڭداعان جاڭا وندىرىستىك جانە سەرۆيستىك جوبالار ىسكە اسىرىلىپ، 100 مىڭعا جۋىق جۇمىس ورنى اشۋ جوسپارلانىپ وتىر.
الەۋمەتتىك سالا دا نازاردان تىس قالمايدى. حالىقتى سپورتقا تارتۋ ءۇشىن جاڭا نىساندار سالىنىپ، بۇل ماقساتقا 1 ترلن سۋم بولىنەدى. سونىمەن قاتار مەكتەپ كىتاپحانالارى جىل سايىن 10 ميلليون كوركەم ادەبي كىتاپپەن تولىقتىرىلىپ، جاستاردىڭ وقۋعا دەگەن قىزىعۋشىلىعىن ارتتىرۋ كوزدەلۋدە.
وسىلايشا، 2026 جىل وزبەكستاندا ماحاللانى قوعام دامۋىنىڭ وزەگىنە اينالدىرۋعا باعىتتالعان اۋقىمدى رەفورمالار جىلى بولماق.
ايتا كەتەيىك، ماحاللا — بەلگىلى ءبىر اۋماقتا تۇراتىن تۇرعىنداردىڭ بىرىككەن جەرگىلىكتى قاۋىمداستىعى. ول كورشى-قولاڭنىڭ ءوزارا كومەگىنە، بىرلىك پەن ىنتىماققا نەگىزدەلگەن. ماحاللادا الەۋمەتتىك ماسەلەلەر شەشىلىپ، تۇرمىسى تومەن وتباسىلارعا قولداۋ كورسەتىلەدى. سونداي-اق جاستار تاربيەسىنە، قوعامدىق ءتارتىپ پەن ءداستۇردى ساقتاۋعا كوڭىل بولىنەدى. قازىرگى وزبەكستاندا ماحاللا رەسمي باسقارۋ جۇيەسىنىڭ ماڭىزدى بولىگى بولىپ سانالادى.
