تۋريزم جانە سپورت ءمينيسترى ەربول مىرزابوسىنوۆ ءماجىلىس وتىرىسىنان كەيىن جۋرناليستەردىڭ سۇراقتارىنا جاۋاپ بەردى، دەپ حابارلايدى «ادىرنا» ۇلتتىق پورتالى.
جۋرناليستەردىڭ ءبىرى مينيسترگە «ءسىز ءوزىڭىزدى مينيستر قىزمەتىنە لايىقتىمىن دەپ سانايسىز با؟ پاريج وليمپياداسى كەزىندە سپورت كوميتەتىن باسقاردىڭىز، ۇلتتىق قۇرامانىڭ جارقىن جەڭىسكە جەتە الماۋىنا ءوزىڭىزدى دە جاۋاپتىمىن دەپ ەسەپتەمەيسىز بە؟» دەپ سۇراق قويدى.
ەربول قۋانتايۇلى كەلەسى جىلى سپورت سالاسىندا جۇمىس اتقارعانىنا 20 جىل بولاتىنىن ەسكەرتتى.
«ءوزىمنىڭ سپورتتاعى تاجىريبەمدى قوسسام، وندا 30 جىلعا جۋىق بولادى. بۇگىنگى كۇنى وسى جۇمىسقا قاراپ، كەلەشەك جۇمىسىمىزدىڭ باعاسىن حالىق بەرەدى. وعان لايىقپىن با، ەمەسپىن بە، ەندى مەملەكەت باسشىسى سەنىم ارتقاننان كەيىن مەن جۇمىس ىستەپ جاتىرمىن.
ال وليمپيادانىڭ ناتيجەسىنە بايلانىستى، وزدەرىڭىز بىلەتىندەي، پاريج وليمپياداسىنا دەيىن ازيا ويىندارى ءوتتى، ول جەردە سپورتشىلارىمىز 11-ورىن الدى. بۇل ارينە وتە تومەن ناتيجە. پاريج وليمپياداسىنا توكيو وليمپياداسىنا قاتىسقان سپورتشىلارىمىزدىڭ 80 پايىزى كەلدى. جەڭىل اللەتيكادا 200 مەتردى 21 سۋكۋندتا كەلەدى. 10 ايدا الەمدىك رەكوردتا كەلۋ وڭاي ەمەس سپورتتا، بىراق سوعان قاراماستان سول ازيا ويىندارىنان كەيىن 10 ايدىڭ ىشىندە عىلىمي توپتار قالىپتاستىرىلىپ، ءار سپورت تۇرىنەن جەكە جوسپار قۇرىپ، سپورتشىلارىمىزدى وليمپياداعا تىڭعىلىقتى اكەلۋگە تىرىستىق. ناتيجەنى جامان دەپ ايتا المايمىن. ناتيجە قاي كەزدە جاقسى بولادى، ناتيجە كەيىنگى ينديكاتوردا، الدىعى ينديكاتوردا العا باسساق جاقسى بولادى. ءبىز 83 ورىننان، 43 ورىنعا كوتەرىلگەنىمىز بۇل ينديكاتورلاردىڭ ورىندالۋى دەپ ەسەپتەيمىن»، – دەدى ول.
