فوتو جي كومەگىمەن جاسالدى
پرەزيدەنت قاسىم-جومارت توقاەۆ 16 جاسقا تولماعان بالالاردىڭ الەۋمەتتىك جەلىلەرگە تىركەلۋىنە زاڭ جۇزىندە تىيىم سالۋ باستاماسىن قولدايتىنىن ايتتى، دەپ حابارلايدى "ادىرنا" ءتىلشىسى.
بۇل تۋرالى پرەزيدەنت 26 تامىز كۇنى وتكەن «جاڭا كونستيتۋتسيا – ءبىلىم بەرۋ جۇيەسىنىڭ ستراتەگيالىق نەگىزى» اتتى تامىز كونفەرەنتسياسىندا ايتقان.
مەملەكەت باسشىسى جاس ۇرپاقتىڭ قاۋىپسىز ورتادا ءومىر سۇرۋىنە جاعداي جاساۋ قاجەتتىگىن اتاپ ءوتتى. ونىڭ ايتۋىنشا، مۇنداي شارا الەمنىڭ بىرقاتار ەلىندە ەنگىزىلىپ جاتىر.
«ەگەر ءتيىستى زاڭ قابىلدانسا، ونى تولىق جۇزەگە اسىرۋ تەتىگىن ويلاستىرۋىمىز كەرەك. قاۋقارسىز زاڭ ەشكىمگە قاجەت ەمەس»، – دەدى قاسىم-جومارت توقاەۆ.
پرەزيدەنت ونلاين-پلاتفورمالار مەن بۇقارالىق اقپارات قۇرالدارىنا قاتىستى زاڭناماعا دا ەرەكشە نازار اۋدارۋدى تاپسىردى. ونىڭ پىكىرىنشە، اقپارات كەڭىستىگىندە ازاماتتاردىڭ قۇقىقتارى مەن زاڭدى مۇددەلەرىن قورعاۋ ءۇشىن قوسىمشا شارالار قاجەت.
سونىمەن قاتار مەملەكەت باسشىسى ەرەكشە قاجەتتىلىگى بار بالالاردى قولداۋ ماسەلەسىنە توقتالدى. ول مۇنداي بالالاردىڭ تولىققاندى ءبىلىم الۋىنا جاعداي جاساپ، مەديتسينالىق جانە الەۋمەتتىك قىزمەتتەردىڭ ساپاسىن ارتتىرۋ قاجەتتىگىن ايتتى.
پرەزيدەنت ەرەكشە قاجەتتىلىگى بار بالالارعا ارنالعان ورتالىقتاردى ءار وبلىس پەن ءىرى اۋداندارداعى قالالاردا سالۋ كەرەكتىگىن اتاپ ءوتتى.
سونداي-اق پرەزيدەنت قاسىم-جومارت توقاەۆ ەنەرگەتيكا سالاسىنىڭ تەحنولوگيالىق تۇراقتىلىعىن قامتاماسىز ەتۋ جانە بالامالى ەنەرگيا كوزدەرىن دامىتۋعا باعىتتالعان زاڭ جوبالارىن جەدەل قاراستىرۋ ماڭىزدى ەكەنىن ايتتى.
